John Mayer 'Sob Rock' hralh a kal ber Billboard 200 chart topper Pop Smoke

Kar hmasa chhung khan Billboard Top Album Sales Chart topper chu John Mayer-a album thar 'Sob Rock' a ni a, Billboard 200 chart-ah erawh pakhatna a ni pha lo thung a, rapper fam ta Pop Smoke album 'Faith' a tluk zo lo a ni.

John Mayer 'Sob Rock' hralh a kal
Billboard’s Top Album Sales chart-ah John Mayer 'Sob Rock' hi pakhatna a ni a, July 31-a a tlangzarh album aia hralh kal hi kar hmasa chhung khan a awm lo niin MRC Data chuan a tarlang.

John Mayer album thar hi thla hnih chhung vela album hralh kal ber a ni a, Olivia Rodrigo khan 'Sour' kha copy 72,000 a hralh a, Mayer hian copy 61,000 hralh thungin Olivia 'Sour' hnua album hralh tam ber a ni.

Kum 2014 December 6 hmalam phei kha chu nise Billboard 200 albums chart-ah pawh pakhatna ni tur a ni a, mahse Billboard hian khami hnuah khan an kaldan phung thlakin copy hralh tam mai bakah digital sales leh stream zawng zawng Billboard 200-ah hian kaikawpa 'equivalent album unit' (EAU) hmanga a teh tak avangin Pop Smoke 'Faith' a tluk phak ta lo a ni.

John Mayer hi Artist 100 chart-ah pawh pathumna hial a rawn ni phak ve ta bawk a, he chart-ah hian BTS leh Olivia Rodrigo a tluk pha lo thung.

Billboard 200 roreltu Pop Smoke
February 19, 2020-a boral ta Pop Smoke album an tlangzarh pahnihna 'Faith' hi kar hmasa chhung khan US-a EAU hmu chhuak tam ber a ni a, EAU 88,000 lai a hmu chhuak a ni.

Album sales-ah chuan 4,000 chiah a hmu chhuak thung a, mahse on-demand stream lamah vawi mtd 113.34 lai stream a ni thung. Chumi hmang chuan EAU 83,000 lai a hmuh chhuah phah a, chart-ah John Mayer album tharin a tluk zo ta lo.

Pahnihna Mayer-a album thar 'Sob Rock' chuan EAU 84,000 a hmu chhuak thung a, album hralhah nasa takin hma hruai zawk mah se on-demand stream lamah a album thar hi vawi mtd 28.59 chiah stream a ni a, Pop Smoke hi a pha lo hle a ni.

Pathumna chu Olivia Rodrigo 'Sour' kha a la ni a, kar hmasa lamah khan he album hi pakhatna a ni thung.

Single chart lamah BTS an la vul
Artist 100 chart roreltu BTS hian 'Butter' hmangin Hot 100 chart-ah ro an rawn rel leh a, Songs of the Summer chart-ah pawh he hla hi pakhatna a ni leh bawk. 'Butter hi kar hmasa lamah khan pasarihna niin an hla 'Permission to Dance' kha pakhatna a ni a, tunah hian Permission to Dance' chu pasarihnaah a awm ve leh chiah a ni.

Olivia Rodrigo 'Good 4 U' pawh a la che ṭha reng a, chart hrang hrangah 'Butter' hnuai chiahah a awm hlawm.