Scarlett Johansson-in Disney a khing!!! Disney-in an chhang let

'Black Widow' star Scarlett Johansson attorney chuan Disney chuan Ningani khan Los Angeles Superior Court-ah Disney khinna tur a thehlut. Disney hian an streaming platform lamah 'Black Widow', theatre-a tlangzarh nia an pek chhuah vangin Scarlett Johansson hian Disney hi a khing a ni.

Thubuai thehluhah chuan theatre-a tlangzarh ruala Disney+ lama 'Black Widow' tlangzarh ve nghal chu an inremna bawhchhiatna a nih thu ziah a ni a, sum tam tak Johansson chuan a chan phah niin an ziak.

"Disney hian 'Black Widow' ang chi film lian Disney +-a direct a tlangzarh hi subscriber a neih tamna tur a ni tih chu thuruk a ni hauh lo, chu chuan company stock price pawh a tisang hle- Covid-19 chhuanlamin chung zawng zawng chu a phenah an ti a ni.

"Hei hi Hollywood-a talent nei ṭha tak takte'n Disney an hmachhawn tawpna pawh a ni hauh lo ang, company thiltum chu engpawh nise, dan anga contract an lo siam tawh chu an zah tur a ni," tiin Scarlett Johansson attorney John Berlinski chuan thuchhuah a siamah a tarlang.

Scarlett Johanson attorney thubuai thehluhah hian Johansson leh a executive producer-te contract-ah chuan theatre-a tlangzarh chungchang chiah a tel niin a inziak bawk. Hemi chungchang hi The Wall Street Journal chuan an tarlang hmasa ber a ni.

Disney chhanletna
Walt Disney Company chu an ngawi mai mai bik loa, Scarlett Johansson thubuai thehluh chungchangah chuan thuchhuah siam nghalin thubuai thehluh chu awmze awm lo a nih thu an sawi.

Covid-19-in khawvel puma harsatna a thlen laia hetiang lawsuit thehluha a awm chu pawi an tih thu leh hrehawm an tih thu an sawi bawk.

Company chuan an star hnenah chuan $maktaduai 20 lai an pe tawh tih tarlangin Disney+ aṭanga an sum lakluh aṭangin sum pawh a la hmuh belh thei tih an tarlang tel a ni.

'Black Widow' film hi July 9 khan US-ah tlangzarh a ni a, theatre bakah Diney+-ah tlangzarh tel nghal a ni. Hrilen hnua film tlangzarh tawh zingah chuan hlawhtling ber pawl a ni der tawh a, Box Office aṭangin $mtd 319.5 chuang sum a lalut der tawh.

Kumin chhunga film sum lalut tam pangana a ni phak tawh a, Disney+ kaltlangin tlangzarh karah khan $mtd 60 lai sum a lalut hman bawk a ni.

Scarlett Johanson hi kum 2010-a tlangzarh 'Iron Man 2' aṭang khan 'Natasha Romanoff / Black Widow' lemah hian a chang ṭan a, MCU film pakua laiah he character lemah hian a chang tawh a ni.