Silk Sonic hla thar 'Skate' a mawi

R&B superduo, Silk Sonic (Bruno Mars leh Anderson .Paak) te chuan nimin khan hla thar 'Skate' an drop a, ngaihthlak a manhla lehpek hle.

Social Media lamah nimin piah (Nilaini) khan hla thar an drop dawn tih hi an puangzar lawk tawh a, an hla hmasa 'Leave The Door Open' ngainatute chuan nimina an hla thar tihchhuah pawh hi an ngaina leh ngei ang tih a chiang.

'Skate' hi an album tihchhuah tur 'An Evening With Silk Sonic'-ah a awm tel ngei dawn tih a hriat a, February thla vel khan he album hi an peihfel daih tawh niin media ṭhenkhat chuan an tarlang a, Mars leh .Paak hian tlangzarh hun tur erawh an la puangzar lo.

An album thar tur hi kuminah erawh kan ngaihthlak hman ngei hmel a, 'Leave The Door Open' pawh kha he album-a mi tur hi a ni bawk.