Wes Anderson-a film tharah Tom Hanks

Academy Award pahnih lai dawng tawhtu Tom Hanks chu film siamtu lar Wes Anderson-a film tharah a inlan dawn.

Tom Hanks hi Anderson-a film-ah hian a la inlan ngai lo a, tun hi an vawi khat thawhdunna tur a ni. Wes Anderson-a'n a lo thawhpui tawh Bill Murray, Tilda Swinton leh Adrien Brody-te nen he project-ah hian an thawk ho ang.

Kum 65 mi Hanks-a film channa thar tur hi a film hming puanzar a la ni lo a, The Hollywood Reporter-in an tarlan dan chuan he film thar turah hian role pawimawh tak erawh a chang dawn lo.

Murray hi chu 'The Grand Budapest Hotel' filmmaker nen hian film pakua laiah an thawk dun tawh a, thawhpui nuam a tih thute pawh a lo sawi lang tawh nghe nghe a ni.