Forbes' annual list of highest-paid celebrities Federer leh C. Ronaldo-te tluk loh Kylie

Forbes magazine chuan kumtina a tih ṭhin angin milar zinga sum hailut hnem list an tichhuak leh a, kar hmasa lawka billionaire ni tawh loa an puan Kylie Jenner chu sum lalut hnem berah an puang.

American sumdawng, model leh media personality ni bawk Kylie Jenner hi kum 22 chiah la ni mah se hausakna lamah erawh a u hle a, kum liam ta chhung khan $mtd 590 lai a lalut hem mai a ni. Kylie hi a Kylie Cosmetics stake 51% beauty giant Coty hnena a hralh avangin a sum lakluh nasa takin a pung niin an tarlang a, hei vang hian milar sum lalut zingah pawh hian a sum lakluh hi a tam fal hle.  

Kylie dawtah hian Kanye West a awm a, ani hian kum kal ta chhung khan $mtd 170 lai lalutin Kylie nen erawh an sum lakluh hi a inthlau rem rem hle. Forbes-in a chhut sak dan chuan Kanye West hausak zawng hi $tld 1.3 lai a ni thung. West hian Adidas thawhpuia Yeezy sneakers a siam chhuak kha a hlawkpui hle a, a sum hnar pui ber pawh niin Forbes chuan a tarlang a ni.

Milar infiammi zingah chuan Roger Federer-a'n sum a hailut tam ber a, $mtd 106.3  a lalut a ni. Infiammi zinga sum lalut tam ber dinhmuna tennis player ding thei hmasa ber a ni a, milar zingah erawh sum lalut tam pathumna a ni thung. 

Football legend pahnih Cris­tiano Ronaldo leh Lionel Messi chuan Federer hi dawntin palina leh pangana an ni a, Cristiano Ro­naldo hian $mtd 105 lalutin Messi hian $mtd 104 a lalut ve bawk. 

Milar sum lalut tam zual 10 zingah hian infiammi lang phak panga an awm a, Brazilian star Neymar chu $mtd 95.5 lalutin pasarihna a ni. Basketballer LeBron James chu pakuana niin $mtd 88.2 a lalut.

Neymar hian Tyler Perry a tluk lo a, Perry hi parukna niin $mtd 97 a hailut a ni. Neymar dawtah hian Howard Stern a awm a, ani hian $mtd 90 a lalut a ni. LeBron James dawtah hian Dwayne 'The Rock' Johnson chu awm ve bawkin a ni hian $mtd 87.5 a lalut a ni.

Self made Billionaire naupang bera puangtu finance magazine Forbes hian pre-tax earning hmangin milarte hausakna hi an chhut ṭhin a, June 2019 leh May 2020 inkara milarte sum lakluh dan a chhut hnuah Kylie hi tunhnai lawk khan Billionaire a ni tawh lo niin an puang a ni. Mahse Kylie lawyer Michael Kump chuan Forbes hi chhang letin thu dik lo puangzarah a puh thung a, an thuchhuah siam chu hnukkir leh turin a ti.

Kylie pawh hian social media kaltlangin Forbes-in a chungchang an chhuah chu a chhanglet tawh bawk a ni.