Box Office: Jungle Cruise a hlawhtling

Box Office-ah fantasy adventure film 'Jungle Cruise' chu kar liam ta chhung khan sum lalut tam ber a ni a, a sum lakluh a tam nghal hle.

Jungle Cruise a hmuhnawm
Dwayne Johnson, Emily Blunt, Jack Whitehall, Jesse Plemons, leh Paul Giamatti-te channa 'Jungle Cruise' hi Zirtawpni liam taah khan Disney+ leh Theatre-a en theih turin US-ah tlangzarh a ni a, theatre 4,310 aṭangin $35,018,731 lai a lalut.

He film hi $mtd 200 vel lai senga an siam a ni thung a, US pawn lam aṭangin $27,630,000 lai lalut ve bawkin nimin thleng khan Box Office aṭangin $62,648,731 a lalut tawn a ni.

Streaming service lama en theih tura an chhawp chhuah tel hi chuan Mizoram lam aṭang pawhin a fiah entur hi kan lo nei ve nghal vat ṭhin a, chumi avang chuan mi tam tak chuan he film pawh hi an en fur tawh hlawmin a rinawm.

Film review-tu lam chuan Johnson leh Blunt-te chevel an fak rualin screenplay leh CGI an hmang nasa lutuk chu an sawisel ve leh thung a ni.

Old a la tar lo, pathumna The Green Knight
Kar hmasa lama sum lalut tam ber 'Old' chu pahnihna a ni thung a, theatre 3,379 aṭangin $6,862,425 lai sum a lalut leh. 'Jungle Cruise' nen erawh an sum lakluh a inthlau rem rem hle.

Pathumna chu film thar 'The Green Knight' niin he film hian $6,745,121 a lalut a ni. Alicia Vikander leh Joel Edgerton-te channa 'The Green Knight' hi medieval fantasy film lam ngainatute tan chuan hmuhnawm tak tur a ni a, critics lam pawhin an fak angreng hle.

Film thar, film thar
Pangana 'Stillwater' chu film thar a ni a, 'Nine Days' (26), 'Enemies of the State' (33) leh 'Never Gonna Snow Again' (35)-na te chu film thar a ni bawk. Box Office Mojo chart-ah film 46 lai tarlan a ni a, hei hian khawthlang lamah chuan film industry pawhin hma a sawn leh viau tawh a ni tih a tilang chiang awm e.