Bruce Springsteen fanu Olympian Jessica Springsteen

Bruce Springsteen chu tunge a nih kan hria a, sawi nawn a ngai lo. A fanu Jessica Springsteen erawh hi chu mi tam tak chuan kan lo la hre kher lo mai thei.

Tokyo Olympics khelh mekah hian Jessica Springsteen chu USA team-ah telin, sakawr chung chuan thiam(equestrian) a ni a, nimin lamah khan an ram aiawhin a sakawr, kum 12-a upa Don Juan van de Donkhoeve chu a tlanpui a ni.

Jessica hi kum 29 mi niin tunah hian FEI show jumping ranking-ah khawvel pumah 14-na lai a ni pha a, US Olympic equestrian team-ah a naupang ber nghe nghe.

Bruce Springsteen-a fanu nih ringawt a duh tawk lo
Olympic gold medalist Melanie Smith Taylor chuan New York Post hnenah Jessica chuan Bruce Springsteen-a fanu nia hriat ringawt chu a duh tawk lo tih a sawi thu a hrilh a, ama kawng ngei sial a duh tih leh chu chu a tihlawhtling ta reng bawk niin a sawi.

"Naupang tê ka nih lai aṭangin sakawr chungah kan chuang ṭan tawh," tiin Jessica chuan People Magazine-in an kawmnaah a sawi a, a nih pawh a ni reng lahtak a. Kum 4 mi lek a nih laiin sakawr chung chuan a ṭan der tawh a, kum 6 mi a nih meuh chuan ama pualin sakawr a nei der tawh!

Hun rei nghah a ngai lo, sakawr chung chuan hmanga intihsiakna hrang hrangah a tel nghal a, kum 2008 a nih meuh chuan ASPCA Maclay Finals-ah a champion der tawh a, 2009 WEF Excellence in Equitation Championship-ah pawh a champion bawk.

Kum 2010 aṭang khan intihsiakna sang ber, Grand Prix show jumping circuit-ah a inlan ṭan der tawh a ni.

Olympic-a inlan tura a zinkawng
Kum 2012 khan London-ah khan US aiawhin a zin chhuak tawh a, mahse intihsiakah erawh inlan hun a nei ve ta lo. Kum 2014 khan American Gold Cup-ah chakin a hnu kum lamah pawh che ṭha chhunzawm hle mah se Rio Games-a inlan tur erawh chuan a la tawk zo lo.

An ram hminga zin chhuak tura thlan a nihna tur hian nikum lam aṭang khan a che ṭha chho hle a, U.S. jumping team chu FEI Jumping Nations Cup USA-ah nikum khan a champion pui bakah kumin June 13 khan K 4* Grand Prix Hubside Jumping Tour event-ah a champion bawk. Tunah chuan US aiawh tura thlan loh chi ziazang a ni ta lo.

Tokyo Olympic-ah chuan US mipuite chuan zaithiam Springsteen ni loin sakawr chung chuan thiam Springsteen lamah an mit leh beng an chhi ta zawk a ni.

"Ka career chhung zawng hian ka ram ai awh hi ka tum ber a ni ṭhin, Olympics-a chumi ka tihlawhtling thei chu, kan tan chuan chawimawina a ni," tiin Jessica Springsteen chuan a sawi.