RD-i BOLD V.2 (Confession) tluk zo an awm lo
Honda Dio Ṭhazual Lengzem chart-ah rapper Rd-i rawn comeback-na hla BOLD V.2 (Confession) chu No.1 a ni a, RPA & Rinhlui Pialtu 'Lokir leh mai rawh' chu pahnihna niin Marshall Fka ft Lazzy 'Kumtluang atan' pathumna a ni bawk.
Ladylicious a lo kir
Kum 10 lai a reh hnuah nikum kum tawp lamah khan music khawvelah a rawn let a, music video thar BOLD V.2 (Confession) a rawn tichhuak a, a hit nghal hle. Rd-i aka Ladylicious hla thar ber BOLD V.2 hi thawnthu sawi ang deuh a ni a, Rd-i'n rap music ngaihnawm tak Mizote min ngaihthlak tir leh ta a ni. Nikum kum tawp dawn hnaiah khan a music video that hi a tichhuak a, Ṭhazual chart-ah a mikhual lo nghal hle a, tunah chuan pakhatna dinhmun hial a luah theih ta a ni.
YouTube lamah pawh thlirtu nuai 1.5 chuang an awm tawh a, hei hian Rd-i rap ngaihthlak nuam titu an la tam zia a tilang chiang awm e. He hla hi Rpa Ralte (RP Records)-ah a record a, a beat mawi tak hi Noras Lalruatfela siam sak a ni bawk.
RPA & Rinhlui Pialtu pahnihnaah an awm ve thung
Chart hmasaa pakhatna RPA & Rinhlui Pialtu 'Lokir leh mai rawh' chu pahnihnaah a awm ve thung. Rpa leh Rinhlui Pialtu hla hi a mawi hle a, BOLD V.2 chhuah hma lawka an tihchhuah hi niin, Ṭhazual chart-ah an inum chho zak zaka, tun ṭum chart-ah hian pahnihnaah an awm ve leh ta thung a ni.
Marshall Fka ft Lazzy 'Kumtluang atan' chu pathumna an ni ve leh bawk a, anni pawh hian zawi muangin hma an sawn ve bek bek a, an dinhmun an sawh nghet ve mek zel. Chart-ah pakhatna pawh lo ni tawh Mizo Idol star Teawmi 'Facebook' chu palina a ni a, Thiamchantira chuan 'Hringnun hi' tih hmangin Top 5 a khar.
Honda Dio Ṭhazual lengzem Top 10
1 RD - BOLD V.2 (Confession)
2 RPA & Rinhlui Pialtu - Lokir leh mai rawh
3 Marshall Fka ft Lazzy - Kumtluang atan
4 Teawmi - Facebook
5 Thiamchantira - Hringnun hi
6 Ruth Z Fanai - Ka rim ang che
7 Dj Lalvenhimi - Ka dawn lungruk
8 Dinmawia Chawnghlut - Inhlan zel ang
ft Lawmkimi Chawnghlut
9 Mimi Remruatsangi - Vul zel rawh aw
10 Didika Chhakchhuak - I bei reng si