Seraphic Choir-in music video thar an tichhuak

Ṭhazual Award-a Best Group/Duo dawng tawhtu Seraphic Choir music video pasarihna 'Hnehna Lallukhum' chu en theih turin choir family-a mi Lalrawngbawla chuan Zirtawpni liam ta khan ṭawngṭaia Pathian hnena hlanin a tlangzarh.

He hla hi Dr Jolene Lalsangkimi lehlin a ni a, video hi Mawitea, RDS Shots kut chhuak a ni bawk. 'Hnehna Lallukhum' music video-ah hian kohhran hrang hrang hmun a lang kim thawkhat hle a, video buaipuitu pawh an ṭhahnem hle nghe nghe. An music video buaipuitute chungah hian Seraphic Choir chuan lawmthu an sawi a ni. Seraphic Choir music video thar hi MDM Library-ah an dah tawh a, Zonet lamah en theih a ni thuai dawn. Kar leh lamah hi chuan YouTube lamah en theih a ni tawh bawk ang.