Science & Environment Mangrove thingkungte'n mang lam an hnaih!

Khawvel lum zel vangin sea-level a sang zel a, chu chuan nghawng ṭha lo tam tak a neih zingah tuipui kam leh khawlum hmuna ṭo ṭhin Mangrove thingkungte pawh dinhmun derthawngah an ding mek.

Scientist-te chuan tun ang renga sea-level a san zel a, greenhouse gas emission tihtlem a nih loh chuan kum 2050-ah chuan Florida leh khawlum hmun danga awm ṭhin Mangrove thingkungte chu an mang mai dawn tih an sawi.

Mangrove-te hi tuipui kam ecosystem tana ṭangkai tak an ni a, Mangrove forest-te hian carbon tam tak up betin tuipui kam boruak an vawn ṭhat bakah sangha leh thilnung dang eng emaw zat tan khawsakna an siam sak a ni. 

Macquarie University, Australia kaihhruaina hnuiah Mangrove zirchiangtu mithiamte chuan kum 10,000 chhung sediment data an zirchian aṭangin Mangrove-te damkhaw chhuah theihna chu sea-level san leh san lohah nasa takin a innghat tih an sawi.

Mangrove-te hi sea-level san zawng kum khata 5 millimeter zel a nih chuan damkhaw chhuak zel thei tura ngaih an nih laiin kum khata 6 millimeter-a a san zel chuan an dam chhuak zo dawn lo a ni.

Rutgers University-New Brunswick School of Arts and Sciences-a Department of Earth and Planetary Sciences post-doctoral scientist Erica Ashe chuan high-emissions scenario hnuaiah chuan tropical coastline tam taka sea-level san zawng chu kum khata 7 millimeter atling dawn tih a sawi a, hetiang a nih hi chuan Mangrove-te hian ṭhan zel theihna chance 6.2% chiah an nei a ni, a ti.

Mangrove ecosystem hi a buai a nih chuan tun ai hian atmosphere-ah carbon dioxide a tam zawk dawn a ni.

Khawvel pumah mangrove hi chi 80 vel a awm a, tropical leh subtropical area-ah awm ṭhinin tuipui kam environment chhe tur an veng hle a, tui current leh tuilian tur thleng pawhin eng emaw chen an veng tih National Oceanic and Atmospheric Administration chuan an sawi.