Entertainment khawvel leh Coronavirus

Novel Coronavirus, Covid-19-in khawvel a chawk buai a, media-a kan thil hmun tam ber pawh Covid-19 leh a kaihhnawih a ni.

Film industry nasa takin a tibuai a, music industry a zuah bik lo a, fashion industry thlengin nasa takin a nghawng a, khawvel a dam lo a ni ber. Entertainment khawvelah pawh ruahmanna awm sa tam tak tih danglam a ngai a, tarlan sen pawh a ni lo hial. Award, concert leh show lian tham tak tak ṭhulh leh tihkhawtlai a ngai nasa hle a ni. Film hrang hrang tihchhuah hun tur tihkhawtlai a ni a, chung zingah chuan 'Fast And Furious 9' pawh a tel.

Zaithiam leh milar hrang hrangin inkhung hran an duh a, an inkhung hrang bawk. Mipuite'n an ngaihhlut live show hrang hrang a nghawng a, Covid-19 leh a chhehvel bak khawthlang media-te pawhin tarlan tur an hre meuh lo.

Country Music Award ngaih hlut  Academy of Country Music Awards 2020 (ACM), April 5-a MGM Garden Arena, Las Vegas-a sem tura ruahman chu tihkhawtlai a ni a, September-ah sem a ni dawn tih a buatsaihtute chuan an puang ve leh ta. 

ACM hi an sem ni tur tak an la tarlang lo a, buaina hrang hrang karah an kaltlangpui dawn niin lo sawi tawh mah se US president Donald Trump-a'n Zirtawpni liam taa Covid-19 vanga national emergency a puan takah chuan tihkhawtlai a nih thu hi an puang leh ta a ni.

Kumin ACM hi Keith Urban chuan a host dawn a, mahse an sem thei dawn ta rih lo a ni. "ACM hi Country Music industry tentpole event a ni a, Academy of Country Music leh dick clark production-te chuan artist-te chawimawina turin thui tak thil ngaihtuahin hma an la a ni. Thutlukna kan siamnaah pawh hian mi hrang hrang an tel a, Country community-te'n him taka hun an hman theihna turin ni thar an puan theih thuai kan beisei a ni," tiin  Academy of Country

Music CEO Damon Whiteside chuan a sawi.

Golden Raspberry Awards, Razzie Awards tia sawi bawk chu Inrinnia sem tura tih kha ni mah se Covid-19 vangin chawpchilh takin an ṭhulh.

Kum 1981 aṭanga sem ṭan tawh, film industry parody award, Razzie Awards vawi 40-na hi Inrinni khan Barnsdall Gallery Theatre, Los Angeles-a sem tura ruahman a ni a, inbuatsaihna zawng zawng pawh kalpui vek tawh mah se Mayor Eric Garcetti chuan mipui punkhawm theih zat chungchangah khuahkhirhna a siam tak avangin chawpchilh taka an ṭhulh a ngai ta a ni. Official-te chuan an ṭhulh fel dawn nge ni a, remchang dangah an sem leh dawn tih an la tarlang lo.

Rock and Roll Hall of Fame chuan kumin atana induction ceremony an tihkhawtlai hnuah Rock Hall Museum pawh an khar leh ta. Tun thla tawp lam thleng hi chuan Museum hi khar an tum a ni.

Rock Hall chuan thuchhuah siamin Inrinni aṭang khan Museum khar a nih thu tarlangin, boruak awm dan azirin March 27-ah erawh hawn leh an tum thung. Ticket lei tawhte chuan an duh chuan hawn a nih leh hunah an la hmang thei dawn a, a nih loh chuan a man pek let leh anni ang.

Joel Peresman, Rock Hall president chuan a hmain May 2-a Cleveland, Ohio-a neih tur Rock and Roll Hall of Fame induction ceremony chu sawn hlat a nih thu a lo sawi tawh bawk a ni.

NBC Show America's Got Talent pawh Covid-19 darh zel vangin an chawl lailawk rih dawn. AGT filming hi Zirtawpni liam ta thleng kha chuan an la kalpui a, hetah pawh hian entu an awm tawh lo a ni. Mahse tunah erawh an chawlhsan rih dawn thung tih New York Post gossip column Page-ah tarlan a ni.