Olivia-i record BTS-in an khum The Kid LAROI a zuang sáng
Billboard Hot 100 chart-ah Bangtan Boys chuan an hla 'Butter' hmangin Olivia Rodrigo record lo siam tawh chu an khûm a, Billbord 200 chart lamah The Kid LAROI album 'F*ck Love' chu pakhatna a ni.
BTS nge nge
K-Pop group ropui BTS chuan record thar an siam leh ta.
US tleirawl duhawm Olivia Rodrigo-in a hla 'Drivers License' hmanga kumin chhunga Billboard Hot 100 chart-a pakhatna ni ngun ber record a lo siam tawh chu BTS hi tunkar hian an rawn khum ta.
Olivia Rodrigo 'Drivers License' kha kar riat chhung ngawt mai The Hot 100 chart-ah topper a ni a, kumin chhunga topper ni rei/zing ber a ni. BTS hian an hla 'Butter' hmangin tunkar chart-ah hian The Hot 100 chart-ah ro an rel leh ta a, kar kua lai chart topper an rawn ni ta chiah. Kuminah chuan anni aia Hot 100 chart topper ni zing an awm lo.
BTS hi tunah hian Artist 100 chart-ah pakhatna an ni mek bawk a, kar hmasa pawh khan pakhatna tho niin he chart-ah hian kar 251 zet an hming zu han lang tawh a!
Hot 100-ah hian Lil Nas X & Jack Harlow hla thar 'Industry Baby' chu pahnihna a rawn ni nghal a, Olivia Rodrigo 'Good 4 U' chu pathumnaah a tla thla ve ta thung a ni.
26-na aṭanga 1-naa inhlangkai The Kid LAROI
Australian rapper/singer the Kid Laroi album 'F*ck Love' chu Billboard 200 chart-ah 26-na aṭangin pakhatnaah a rawn inhlangkai.
The Kid LAROI hian he album hi nikum July 24-a a tlangzarh daih tawh kha a ni a, tunhnaiah reissue eng emaw zat, track thar te belha a tihchhuah avangin chart topper a rawn ni leh ta a ni. Billboard 200 chart-ah hian kar 53 lai mai a lang tawh a, kar hmasa chhung khan US-ah chuan equivalent album unit (EAU) 85,000 lai a hmu chhuak niin MRC Data chuan a tarlang.
He album hi nikumah pawh khan vawi hnih a reissue tawh a, nikum chhung ringawt khan track pasarih a belh leh hman. Kumin July 23 leh 27-ah khan reissue nawn lehin track paruk belh pawhin a hnuah pasarih a belh leh a, chung zingah chuan tuna a hla hit mek, Justin Bieber nena an tihchhuah 'Stay' pawh hi a tel.
Olivia Rodrigo album 'Sour' chu Billboard 200 chart-ah pahnihna a ni a, Doja Cat 'Planet Her' chu pathumna a ni thung.
