Naupang khawngaihthlak tana inlan - German biker rualte chu

Biker intelkhawm pawl hrang hrangte hian thil ṭha tak tak an tih hriat tur a awm fo ṭhin. Zoram lama kan biker pawl hrang hrangte pawh an bang bik hauh lo. Germany lamah pawh biker-te chet chhuahna ngainawm tak hriat tur tunhnaiah khan a awm leh tlat mai.

Naupang khawngaithlak duhthusam chu
Thisen Cancer natnain a tlakbuak mek, Northern Germany mipa naupang kum 6 mi lek, Kilian-a chu a chhungte'n a damrei an beisei tawh lo a ni ngei ang, eng nge i duthusam? tiin an zawt a. Chu naupang chu bike ngaina tak niin, an in bula motorbike tlan chu a hmuh chak ber a nih thuin a chang ta a.

Naupang chhungte chuan an fapa, kum ruk mi lek, natna ṭihbaiawm takin a vawn beh tlat duhthusam tihhlawhting tur chuan social media lamah an fapa tihlim tura an in bula bike rawn khalh tur an duh thu an post ta tawp mai a ni.

Chan loh khanah
Naupang chhungte chuan biker 20-30 vel chu a ṭha berah pawh an rawn inlan an beisei a, mahse chu pawh chu beiseina chauh a ni.

Mahse le, biker ho inlan tura an beisei niah tak mai chuan a maka maka tam bike chu an in bulah chuan an rawn tlan ta nguah nguah mai a, chu video leh thlalak chuan mite rilru a hnehin social media lamah pawh a darh nasa hle.

Naupang chhungte chuan an fapa chu pawnah an chhuahpui a, biker-te chuan rawn chibai hlawmin, a ṭhat chhuah leh thuai theihna turin duhsakna te an hlan a ni.

Report ṭhenkhat chuan biker fuankhawm hi sing hnih vel lai niin an sawi hial!

Bike hmasa ber chhuah aṭanga darkar thum zet a liam hnuah bike hnuhnung ber khalhtuin a bike a tinung ve thei chauh niin an sawi.

Biker sing chuang fe mai fuankhawmna hmun hi Lower Saxony-ah a ni a, July 24-a thil thleng kha niin report ṭhenkhat aṭanga a lan dan chuan Denmark aṭangte pawhin he hun hmang tura kal hi an awm a ni.