Hmeichhe zaithiam zinga Hausa ber Rihanna

Forbes-in a tarlan dan chuan 'Umbrella' hitmaker Rihanna hausak zawng chu $tluklehdingawn 1.7 hu a ni tawh a, zaithiam hmeichhe zingah a ni aia hausa an awm lo.

Rihanna hi tunah chuan billionaire a ni der tawh a, hei hi a Fenty Beauty cosmetics company vang niin Forbes chuan an tarlang a ni. He a cosmetic company hlut zawng hi $ltd 1.4 hu lai a ni tawh nia tarlan niin, a lingerie company Savage x Fenty hlut zawng chu $maktaduai 270 vel a ni tawh bawk. Heng bakah hian lemchan aṭanga a sum lakluh leh a zaina aṭanga a sum lakluh zawng zawng nen chuan, $tld 1.7 hu vel zet sum hi a nei tawh a ni.

Entertainer hmeichhe zingah Rihanna hi hausa ber dawttu a ni mek bawk a, Oprah Winfrey a la tluk lo thung.

Rihanna, a hming tak Robyn Fent hian kum 2017 khan luxury goods company LVMH chu thawhpuiin a cosmetic company Fenty Beauty hi a tlangzarh a, a hlawhtlinpui ta hle a ni.

Barbadian singer hi zai lamah chuan, khawvela album hralh tam ber zinga mi a ni. Ram hrang hrangah record maktaduai 250 chuang a hralh der tawh a, zailamah leh sumdawnna kawngah a hlawhtling hle a ni. Mahse kum 2016 hnuah album thar erawh a la tichhuak leh lo.

US single chart-a topper ni thei hla 14 lai a tichhuak tawh a, Grammy award pawh pakua lai dawng tawhin Billboard Music awards 16 leh American Music Awards 13 lai a dawng tawh.

Kum 2012 leh 2018-ah khan Forbes chuan celebrity hlawh tam zingah a lo chhiar tel tawh a, kuminah phei chuan hlawh tam zingah a tel mai ni loin, zaithiam hmeichhe zingah chuan a ni aia hausa an awm ta lo a ni.

Rihanna hi tunah hian rapper A$AP Rocky nen an inzui ngawrh hle niin an sawi a, hmanni lawk khan music video an shoot dun lai hmuh an ni a, an music video thar chu kan thlirin kan ngaithla thuai thei dawn niin a lang.