Midang chhawmdawlna tur Grande & Bieber 'Stuck with U' Sum hmuhchhuah a tam tawh

Ariana Grande leh Justin Bieber-te 2020 charity collaboration 'Stuck With U' chuan $maktaduai 3.5 lai sum a hmu chhuak tawh a, hei hi First Responders Children's Foundation tan an hlan.

Pop Star lar tak pahnih hian nikum May 8 khan an Covid-19 lockdown ballad hi an tichhuak a, an manager Scooter Braun SB Projects bakah an label Def Jam Recordings (Bieber) leh Republic Records (Grande)-te chu thawhpuiin, he hla hmanga an sum thawh chhuah zawng zawng chu, a boa bang awm loin First Responders Children's Foundation hnenah hian an hlan a ni.

First Responders Children's Foundation hian an sum dawnte chu mamawhtu chhungkaw hrang hrang, a bik takin hrileng dona kawnga hmatawnga ṭang healthcare worker, paramedic, firefighter leh EMT te hnenah an hlan ang.

Heng sumte hi a bik takin naupang tana hman a ni dawn a, an scholarship, quarantine avanga an awm lailawkna tur atante leh hripui dona kawnga hmatawng, hripui thihpui tate vuina atante hman tur a nih thu an tarlang.

'Stuck with U' hi an tihchhuah tirh khan Billboard Hot 100-ah topper a ni nghal. He hla vang hian Bieber chuan Hot 100 topper hla paruk a neih phah a, Grande tan a pathumna a ni bawk. An tlangzarh karah khan download kaltlangin 108,000 an hralh nghal a, kar khat chhunga download kaltlanga nuai chuang hla hralh tlin tlemte zinga mi a ni nghe nghe.