Metallica 1 Billion views club-in an lo lawm a che u

'Nothing Else Matters', khawvela rock band ropui ber zinga mi, Metallica chu YouTube lamah 1 Billion views club zingah an chuangkai ve ta.

Heavy metal legend Metallica hla hit 'Nothing Else Matters' music video chu YouTube lamah thlirtu tluklehdingawn chuang an awm ve ta a, nimin chhung thleng kha chuan 1,003,064,967 vel laiin an thlir tawh.

YouTube-ah artist, hetiang dinhmun thleng thei hi an tam tawh alawm, tiin ṭhangtharte chuan rilru an lo pu mai thei. Mahse a ni ngawt miah lo a nia! An vanglai tak takin YouTube a awm miau lo.

He hla hi kum 11 liam ta velah khan YouTube-ah hian an upload a, a hla tak chu kum 1992-a an tihchhuah daih tawh kha a ni.

An frontman James Hetfield hla phuah (credit lamah chuan Hetfield/Ulrich phuah niin a inziak) a ni a, kum 1990-a an tour laia a phuah a ni. A tirah tak chuan tlangzarh pawh a tum lem loa, mahse an drummer Lars Ulrich-a'n an ngaithla chu, mawi a ti ngang mai a, chumi avang chuan an studio album panganaah an rawn telh ta niin an sawi.

Metallica band hi kum 1981-a indin an ni a, an band hi kum 40 zet a ni tawh tihna a nih chu! Studio album 10 lai tlangzarh tawhin Grammy award pakua lai an dawng tawh bawk.

Khawvela commercial band hlawhtling bera ngaitu an tam a, ram hrang hrangah an album copy maktaduai 125 lai kum 2018 thleng khan an hralh tawh. Mi tam tak chuan khawvela rock band ropui berah an ngai hial.

Nielsen SoundScan-in kum 1991-a hla hralh dan a chhut hnuah Metallica hi artist zinga an rimawi hralh ṭha ber pathumna an ni pha hial a, US-ah ringawt pawh an album copy maktaduai 58 an hralh tling a ni.

80's leh 90's artist zingah hian 1 Billion views club-a lut thei hi an la tam lo hle. Guns N' Roses 'November Rain', Nirvana 'Smells Like Teen Spirit', The Cranberries 'Zombie', Whitney Houston 'I Will Always Love You', leh 4 Non Blonde 'What's Up' te nen he huangah hian tunah chuan tual an chai ho thei ta a ni.