Yes Bank kaihhnawihah Anil Ambani thu zawt fiah
Reliance group chairman Anil Ambani chu nimin khan Mumbai-a Enforcement Directorate (ED) office-ah Yes Bank kaihhnawiha thu zawh fiah a ni.
ED-ten an office-a thu zawh fiah tura Ambani an kawl chhan hi Reliance company-in Yes Bank aṭanga loan, cheng vaibelchhe 12,800 an lak chhuah chungchang vang a ni. Ambani company-in loan an lakna lehkha pawimawhte chu ED hian an enfiah ang. He pawisa tam tham tak Ambani company-in an lakchhuah avang hian, Yes Bank hian loan rul ṭhat loh (Non Preforming Assets) a ngah phah thu official-te chuan an tarlang.
Yes Bank tlakchhiat chungchang chhuitu agency-te chuan Yes Bank aṭanga loan hlawm lian tak tak lakchhuah a awm thu an tarlang. Loan hlawm lian la panga thlan chhuah a ni a, union finance minister Nirmala Sitharaman-i'n March 6-a chanchinthar lakhawmtute a kawmnaah, heng loan hlawm lian lachhuaktute hi Anil Ambani company, Essel, IL&FS, DHFL leh Vodafone-te an nih thu a sawi.
Nilaini aṭangin Yes Bank-in service pangai anga kal leh tum
Yes Bank thuneitute chuan twitter lamah Nilaini (March 18) aṭangin a pangngai anga an service kalpui leh an tum thu an tarlang.
Reserve Bank of India (RBI) chuan Yes Bank chu pawisa lama tlakchhiatna a nei tih a finfiah hnuah, March 5 khan a thunun a ni. Mahse March 19 aṭangin ram chhunga Yes Bank branch 1,132-te chu customer-ten an dawr leh thei dawn a, digital services & platform-te pawh a ngai anga kalpui leh theih tura ruahman a ni.
Kar kal ta Zirtawpni khan Union Cabinet ṭhukhawm chuan Yes Bank siamṭhatna tura RBI-in a duan, "Yes Bank Ltd Reconstruction Scheme 2020" chu a pawm fel tawh bawk.