Spy Movie 'Argylle' Apple TV+ hnenah $mtd 200-in hralh

Spy Movie 'Argylle' chu Apple TV+ chuan $maktaduai 200-in neitu nihna an lei niin khawthlang lam media-te chuan an tarlang.

'Argylle' hi Matthew Vaughn spy movie thar tur a ni a, James Bond ang deuh chi ni tura ngaih niin Ellie Conway lehkhabu tlangzarh mai tur behchhana an siam tur a ni.

I rilru chuan, chutiang zat zata han lei! i lo ti mai thei. Mahse a changtu turte chu hria la chu mak i ti lo ang.

Henry Cavill, Sam Rockwell, Bryce Dallas Howard, Bryan Cranston, Catherine O'Hara, John Cena leh Samuel L. Jackson-te chu he film-ah hian an chang dawn miau a, a man a tlawm thei lo. Chumai a la ni lo, Brirish singer lar leh chhelo Dua Lipa pawh a inlan dawn tih a chiang tawh.

He film siamtu tur Matthew Vaughn hi 'Kingsman: The Secret Service', 'X-Men: First Class', leh 'Kick-Ass'-te siamtu kha a ni.

Deadline-in an zawhna chhangin Vaughn chuan Apple nena an thawkdun tur chu phurawm a tih thu sawiin, spy thriller a chhiar tawh zinga ropui a tih ber an siamho tur chu lawmawm a tih thu a sawi.

He film hi 007 ang deuhin a franchise siam chhunzawm an tum a ni.

'Argylle' lehkhabu hi nakkum September 29-ah Penguin Random House's division Transworld Publishers chuan a tlangzarh dawn chauh a, a movie pawh hi nakkum lama tlangzarh an tum tho bawk a ni.