Melissa Benoist-in Supergirl Ṭhenna biahthu a hlan fel ta

CW Series 'Supergirl' season tawpna chu an chang zo fel ta a, achangtunu ber Melissa Benoist chuan Inrinni khan a fan-te a mangṭha fel ta a ni.

'Supergirl' lema chang Melissa Benoist chuan Instagram-ah Chyler Leigh (Alex Danvers) leh David Harewood (Martian Manhunter)-te nena an thlalak hona post-in a caption-ah,"Kum 6 hlimawm tak avang khan ka lawm e- ka lemchanpui ka chhungkua nizui ta te, show atana thawktu zawng zawng te, kar tina lo en ziah ṭhin tute ♥️♥️♥️ @supergirlcw zawhfel a ni ta e," tiin a ziak.

Melissa Benoist hi October 2015 aṭang khan Supergirl lemah hian a chang ṭan a, kum eng emaw zat chhunga TV series-a hmeichhe superhero a changtunu ber an nih loh hnuah Benoist hian chu vawnfung pawimawh tak chu a rawn chelh a, a hlawhtling ta phian a ni.

'Supergirl' hi a tirah tak chuan CSB-ah tihchhuah a ni a, mahse season 2 aṭanga a hnu lam zawng chu The CW-in a pe chhuak thung.

Benoist hi 'Supergirl' series mai bakah hian The CW Arrowverse crossover- 'Invasion!', 'Crisis on Earth-X', 'Elseworlds', 'Crisis on Infinite Earths' leh 'Flash episode Duet'-ahte a inlan Supergirl lemah hian a chang a ni.

Nikum September-ah khan 'Supergirl' Season 6 hi a tawpna ber tur a nih tawh thu puanzar a lo ni tawh a, Inrinniah khan an chang zo fel ta a ni. Season 6-ah hian episode 20 a awm ang.

'Supergirl' pumpuiah hian episode 113 a awm tawh a, season tawp ber hi March 30 khan premier a ni tawh thung a, tunah hian episode pasarih tihchhuah a ni tawh.

Melissa Benoist hi kum 32 mi ni tawhin 'Supergirl' bakah hian film dangah a inlan tam tawh viau mai. 'The Longest Ride', 'Lowriders' leh 'Patriots Day'-ahte pawh khan a inlan a ni. 'Supergirl' hi a larpui deuh ber chu a ni thung a, critics lam pawhin he series-a a che vel hi an fak ṭhin hle nghe nghe.

The CW-in kumin kumtir aṭanga an tihchhuah 'Superman & Lois' pawh kha 'Supergirl' spin-off series hi a ni a, February thla aṭang khan he series hi an tichhuak ṭan a ni.

Benoist hian 'Supergirl' vang hian Teen Choice Awards-te pawh a lo dawng nual tawh a, Best TV Actress phei chu vawi hnih lai a dawng tawh. Saturn Awards pawh 'Supergirl' hian a lo dawng nual tawh bawk.