Firefox hmangtu an tlahniam nasa

Internet browser lar tak Firefox chu tunhnai kum thum chhungin hmangtu an tlahniam nasa hle.

u/nixcraft (via itsfoss) chuan Firefox Public Data Report aṭang ngeiin hemi chungchang hi a tarlan nia sawiin tunhnai kum thum chhung hian he browser hmangtu zat hi maktaduai 46 zetin a tlahniam tih an tarlang.

Kum 2018 kum tawp thleng kha chuan Firefox hi mi maktaduai 244 velin an la hmang a, mahse kumin Q2 report-ah khan hmangtu maktaduai 198 vel an awm thung. Maktaduai 198 chu la tam viau mah se hmangtu tlakhniamna zat hi a tam hle a ni.

Firefox hi kum 2002 khan Mozilla chuan an tlangzarh a, 'user friendly' tak a nih avangin hmangtu pawh an pung chak hle.

Kum 2008 velah phei kha chuan browser hmangtu 30% vel chuan Firefox hi an hmang anga chhut a ni. Mahse tunah chuan Google Chrome lamin hma an sawn hle thung a, web browser hmangtu tam ber, 65% vel chuan Chrome hi an hmang anga chhut a ni.