Box Office : Beisei pha lo ‘The Suicide Squad’
North America Box Office-ah chuan kar liam taah khan ‘The Suicide Squad’ chu sum lalut tam ber a ni a, a sum lakluh zat erawh beisei aiin a tlem hle.
Ngatinge ‘The Suicide Squad’-in beisei a phak loh?
Nipui vawi nga liam taah khan DC comics misual rual awmkhawmna film Suicide Squad chu tlangzarh a ni a, North America Box Office-ah ni thum chhung lekin $maktaduai 133.7 lai a lalut hem hem mai. Critics lamin a film an sawisel nasain entu ṭhenkhat pawhin an fak vak lo. A sum lakluh erawh a tam viau mai.
A chhunzawmna ‘The Suicide Squad’ erawh chumi letling chiah chu a ni thung. Critics lamin an fak a, sum erawh a lalut tlem viau lawi si.
US lamah Covid-19 Delta variant a hluar thar leh a, chuti chung chuan kar tawp liam ta chhung khan theatre 4,002-ah an chhuah tho. Mahse ‘The Suicide Squad’ hian $mtd 26.5 chiah sum a lalut.
Covid-19 hri leng thar leh karah chuatiang zat sum a lalut thei chu a tlem lo in ti a ni mai thei, mahse, he film siamna atan hian $mtd 185 lai an seng a, chu mai a ni lo, film promote-na atan hian $mtd 100 vel zet an seng niin an sawi bawk. Chutiang a nih avang chuan a sum lakluh hi a tlem tih loh chi a ni lo.
Theatre-a tlangzarh rual khan HBO Max lamah an tlangzarh tel bawk nen, film en tura kal ṭhin tam tak chuan mahni in him aṭanga en an thlang ta zawk nite pawhin a lang.
Tunhnaiah budget tam film tlangzarh hoin sum an lalut ruih ruih a, ‘The Suicide Squad’ erawh a sum lakluh a tam lutuk ta lo. Chutiang a ni chung chuan Box Office-ah pakhatna a la ni tho. Box Office-ah sum chevel kar liam ta chhung khan a tam lo tihna a ni.
Margot Robbie, Idris Elba, John Cena, Joel Kinnaman, Sylvester Stallone, Viola Davis, Jai Courtney, leh Peter Capaldi-te channa film hian ram dang aṭanga a sum lakluh zawng zawng nen $mtd 72 vel sum a lalut tawh.
Sum chevel tlemna Box Office
Boruak a pangngai chho viau dawn emaw tih laiin US lamah pawh hri a leng nasa thar leh viau a, chu chuan Box Office a nghawng lo thei lo.
Kar hmasa lama pakhatna 'Jungle Cruise' chu pahnihna a ni a, theatre 4,310 laiah chhuah leh mah se $15,818,590 chiah sum a lalut.
Pathumna 'Space Jam: A New Legacy' phei chuan 'Jungle Cruise' sum lakluh hi a pha lo nasa hle a, $4,325,673 chiah a lalut a ni.
'Old' chu palina niin, 'Black Widow' chu pangana a ni thung.
Film thar
Box Office Mojo-ah film 44 tarlan a ni a, chung zingah chuan Escape from Mogadishu (22), Swan Song (25), John and the Hole (29), Bring Your Own Brigade (32), Even in Dreams (33) leh Naked Singularity (35)-te chu film thar an ni.