Siampuii leh Jaui'n hla hlui an rawn her lum leh e

Siampuii Ralte 'A her leh ngei ang'
Siampuii Ralte chuan Lalruatfela Pachuau hla 'A her leh ngei ang' cover-in music video hnuh nuam tak a rawn tihchhuak a, mit leh beng a tlai lehpek hle.

Siampuii'n 'A her leh ngei ang' music video a tihchhuah hi Zonet lamah chuan thlira ngaihthlak tur a awm tawh a, TV lama lo chang fuh hman lo tan zanin dar 8-ah hian a YouTube channel lamah a dah chhuak dawn.

'A her leh ngei ang' hi tunhma deuh khan a phuahtu Lalruatfela Pachuau hian a sa tawh ṭhin a, Zirtluangpuii te pawhin lo cover tawhin tunah Siampuii'n a rawn thar thawh ve leh a ni.

Jaui'n 'I her ta maw' a sa mawi
Tunlai lengzem artist huhang ngah ber zinga mi Jaui chuan 2000's chhoa hla lar tak ni ṭhin 'I her ta maw' chu a rawn thar thawh leh a, a sa mawi hle.

He hla hi Lalrinṭhai'n thiam taka a sak ṭhin kha a ni a, a hunlai chuan demand channel velah pawh thlan hlawh ber pawl leh lengzem hla lar ber pawl a ni ṭhin.

Jaui hian rawn thar thawh lehin Thawhlehni zanah khan a YouTube channel lamah a dah a, Jaui zai ngainatu i nih chuan a YouTube channel lamah lo hmet chhuak pawp la, i inchhiar lo ang.

'I her ta maw' hi K.L.Tluanga phuah niin, Jaui hian Hope music bawk thawhpui lehin he hla hi a rawn tichhuak a ni.