Bawmrang TV-in Christian Film Competition a buatsaih dawn

Mizo Movie streaming platform Bawmrang TV chuan Christian film competition an buatsaih dawn a, he film insiamsiakah hian mimal leh pawl, a duh apiang tel theih a ni.

Bawmrang TV Co-owner Lalfakawmi Fanai chuan he Christian Film Competition 2021 hi Gadget Store, Dawrpui nena ṭang hoa an buatsaih a nih thu a sawi a, kum tin changtlung zawk a neih chhoh zel kan tum a ni, a ti.

He intihsiakna kaltlang hian Christian film ṭha tak tak leh film maker ṭha tak tak an lo chhuah ngei a beisei thu sawiin, intihsiaknaah hian Visual, Sound, Directing bakah story an ngaihpawimawh dawn thu leh script writer-te pawh zalenna zau tak an pek an ni dawn a, amah erawh chu Kohhran leh hnam inpumkhatna ti chhe thei thil telh erawh chu an remtih dawn loh thu a sawi.

Film hi minute 50 ai a tawi lo tur a ni a, a sei lam erawh chu bithliah a awm lo. December 3, 2021 hmain thehluh tur a ni a, hriatchian duh neite chuan Phone number 9612612884 / 9862658900 ahte hian a zawhfiah theih a ni. Bawmrang TV website (bawmrangtv.com/competition) ah hriat tur dangte chu tarlan a ni bawk.

Bawmrang TV developer C.Lalremruata chuan Bawmrang TV chu kar khat dawn harsatna an tawh thu leh tun dinhmunah chuan engkim a ṭhat leh tawh thu a sawi a, 'Dengi I Love You' tih chhuah a nih hma darkar khat vel aṭangin an buai ṭan tih leh, an developer-te bakah Amazon lam aṭangin Expert-te pawhin theih tawp chhuahin a buai chhan hi an chhui nghal a, kar khat dawn hman hleihtheih loha awm hnu in bot attack (Cyber attack) a ni tih an hrechhuak thei ta tih a sawi.

BawmrangTV hi i hmang duh a nih chuan internet browser aṭangin bawmrangtv.com tih hi chhut luh a, luh mai tur a ni.