Billie Eilish-in Billboard 200 Chart-ah ro a rel

Billboard 200 chart-ah Billie Eilish stuidio album pahnihna 'Happier Than Ever' chu pakhatna a ni a, US bakah ram dang 15-ah he album hi chart topper a ni.

Billie Eilish 'Happier Than Ever' chu
'Happier Than Ever' hi Billie Eilish album pahnihna a ni a, Eilish hian studio album pahnih tichhuak tawhin Billboard 200 chart-ah heng a album pahnihte hi topper a nihpui ve ve a ni.

July 30-a a tlangzarh hla 16 awmna album hi kar hmasa chhung khan US-a album hit ber a ni a, equivalent album unit 238,000 hmu chhuakin kumin chhunga EAU hmu chhuak tam pangana a ni hial.

Album pawh copy 153,000 lai a hralh a, kar hmasa chhunga album hralh hnem ber a ni bawk. Kumin chhunga kar khat chhunga album hralh tam pahnihna ani bawk a, Taylor Swift chiah a tluk pha lo. Album a hralh zat aṭanga 73,000 lai hi vinyl a ni a, vinyl sales hi a sang lutuka chart-a a hnuia chiaha awm The Kid LAROI 'F*ck Love' album chu vinyl sale hmang ringawt hian a lehpel thei a ni.

Billie Eilish hi Artist 100 chart-ah pawh pakhatna a rawn ni nghal a, kar hmasaah khan 24-na niin pakhatnaah a rawn invawrh a ni.

Billboard 200 chart-ah hian kar hmasa lama pakhatna The Kid LAROI 'F*ck Love' chu pahnihna a ni a, pathumna chu Olivia Rodrigo 'Sour' kha a ni thung.

The Hot 100 lamah BTS nek chhuahin an awm ve ta
Hun rei tak chhung Billboard Hot 100 chart-a ro an rel hnuah BTS chu nek chhuahin an awm ve ta. The Kid LAROI & Justin Bieber 'Stay' chu Hot 100 topper a ni a, kar hmasa lamah khan palina niin tun karah erawh pakhatnaah a rawn invawrh ta a ni.

Olivia Rodrigo hla 'Good 4 U' pawh a la hit reng a, chart-ah pahnihna a ni leh. Chart pahnihna hi a ni rei tawh viau mai.

Pathumna chu Dua Lipa ft. DaBaby 'Levitating; a ni thung a, BTS-in record eng emaw zat an siamna hla 'Butter' chu palinaah a tla thla ve ta a ni. Ed Sheeran chuan 'Bad Habits' hmangin top 5 a khar.

Artist 100-ah Prince a rawn lang
Kum 2016-a boral ta Prince Rogers Nelson chu Artist 100 chart-ah palina a rawn ni hlawl a, Artist 100 chart-a a hming lan vawi khatna a ni.

Prince LP 'Welcome 2 America', NPG Records-in July 30-a an tlangzarh chu Billboard 200 chart-ah palina a rawn ni a, chuvang chuan Artist 100 lamah pawh hian a rawn invawrh sang viau.