Arini hla thar 'A nung ka hria' Pathianni zanah YouTube-ah

Praise On star Arini chuan hla thar 'A nung ka hria' chu tichhuakin a YouTube channel, Arini Ralte Official lamah duh hun huna hmeh chhuah theihin Pathianni zanah a dah chhuak ang.

'Beramno Isua' thiam taka satu Arini hian hun eng emaw chen a reh hnuah Ningani zanah khan hla thar 'A nung ka hria' hi Zonet lamah a tichhuak a, a YouTube channel lamah hian Pathianni zanah hian a chhawp chhuak thung dawn a ni.

Arini hla thar hi Fela, Durtlang Leitan phuah niin tun hnai lawka tlangzarh 'Pathian Hmangaihna' album-a mi kha a ni a, Zonet lama lo ngaithla fuh tawhte chuan a hla mawi zia leh ngaihthlak manhla zia an hre chiang awm e.

Music video hmuh a nuamin a felfai ṭha hle a, a hla a mawi bawk nen, fakna hla mawi leh ṭha tak a ni.

Music chu Lal K Sailo kut chhuak a ni a, Masky Records-ah recording chu tiin video chu Chiangtea Videography kut chhuak a ni thung. A hla, music leh video, engkim mai ngaihthlak a manhlain hmuh a nuam viau mai.