Jamaican gold medalist Hansle Parchment-in amah ṭanpuitu a zawng chhuak leh

Tokyo Olympic neih zawh taka mipa 110-meter hurdles gold medalist, Jamaica mi Hansle Parchment chuan inelna bei tura stadium a thlen theihna atana ṭanpuitu chu zawng chhuak lehin, lawmthu sawina atan Team Jamaica t-shirt eng a pek bakah a pawisa hmansak a rul!

Kum 31 mi Hansle Parchment hi 110-meter hurdles final ni khan a bus chuanna tur ni lo zawkah a chuang palh a, an intlansiakna tur hmun ni loin aquatic centre lamah tum loh deuhin a kal ta daih mai a, a mangang hman hle.

Duhthlan tur pakhat chiah a nei tawh, chu chu, Olympic Village-a let leha a bul aṭanga an intlansiakna tur lam pan ṭhat leh - kawng dang hre miau hek lo le.

Rilru mangang tak leh, an intlansiakna tur hmun thlen hman loh hlau taka a awm lai chuan Olympic volunter (official) hmeichhe pakhatin lo ṭanpuiin stadium pan ding nghal tur taxi a laksak a, taxi man tur a pe nghal bawk. Chumi avang chuan intlansiakna hmun chu a hunah a thleng thei ta hram a ni.

Jamaican publication The Gleaner-in a tarlan dan chuan Hansle Parchment hi a in-warm up hman lo hial a, chu nu chu awm lo se a thleng hman dawn lo tihna a ni.

Parchment ṭanpuitu hi kum 25 mi, Olympic volunteer Tijana Stojkovic a ni. Parchment hian gold medal a dawn zawhah amah ṭanpuitu chu zawng chhuak lehin ni hnih hnuah bus dinna hmunah a hmu fuh thei ta a, lawmthu sawina atan Team Jamaica tshirt eng chu pein, taxi hman man chu a rul leh bawk.

An inhmuh lehna video vel chu internet lamah a viral zui a, Jamaican Prime Minister Andrew Holness pawhin Twitter lamah a share nghe nghe. Stojkovic chu an rama zin turin a sawm nghal bawk a, a sawmna chu Stojkovic chuan a pawm dawn em tih chu Jamaica mipui chuan an ngaihven viau mai thei a ni.