Britney pa in a conservatorship nihna titawp dawn

Britney Spears pa Jamie Spears chuan a fanu conservatorship a nihna chu titawp turin thutlukna a siam ta.

Pop star Britney Spears tan chuan thu lawmawm tak a ni ngei ang a, a indona hmachhawn mekah hnehna ropui tak a ni bawk ang. Kum 13 chhung zet a pain a sum chevel zawng zawnga thuneihna a neihna chu a tawp dawn ta a ni.

Britney hian tun hnaiah a pa conservatorship nihna hi tihtawp a duh thu a auchhuahpui nasa hle a, judge lamte pawh a nawr ve nasa hle a ni. Tun hnai deuha court-a a duhzawng sawina hun an pekah phei chuan a pa hi a conservatorship hmang sualah puhin jail-a dah tur hialin a nawr.

Ningani khan Jamie Spears hian Los Angeles Superior Court-ah a fanu conservatorship a nihna tihtawp a tum thu hi puangin, court chu ṭha taka a thlawp dawn thu a sawi a, a conservatorship tihtawp hun tur erawh a sawi lang lo thung.