Siampuii Ralte 'Thawnthu tawp thei lo tur' a ngaihnawm ber

Mystical Mizoram Ṭhazual Lengzem chart-ah Siampuii Ralte 'Thawnthu tawp thei lo tur' a ngaihnawm bera pakhatna a ni.

'Thawnthu tawp thei lo tur' chu
Thla li vel liam taah khan Mizo lengzem artist zinga tunlaia lawm hlawh ber pawl Siampuii Ralte chuan 'Thawnthu tawp thei lo tur' hi a rawn tichhuak a, tunah chuan Ṭhazual chart-ah topper a ni der tawh.

Siampuii hi a zai thiam mai bakah a zai hmel leh a chevel a hmuhnawm ṭhin a, 'Thawnthu tawp thei lo tur' pawh hi music video hmuh nuam tak leh hmuh hahdam tak nen rawn tichhuakin lawm a hlawh a, YouTube lamah phei chuan thlirtu nuai riat chuang an awm der tawh! Nuai kua an tling ṭep tawh hial zawk a, million views a kai har lo turah ngai ang.

Chart hmasa lamah khan he hla hi pathumna a ni a, tunah erawh pakhatnaah a rawn invawrh ta a ni.

Siampuii hi a hla tihchhuah apiang a hit deuh zel emaw tih mai tur a ni a, kar hmasa lawka a tihchhuah, Lalruatfela Pachuau hla 'A her leh ngei ang' a rawn thar thawh leh pawh YouTube lamah chuan nuai chuangin an thir leh der tawh.

Jojo Jongte 'Suangtuahna' pahnihna a ni, Pathumna Zaii
Jojo Jongte chuan ama hla phuah ngei, amah vekin thiam taka a sak 'Suangtuahna' chu pahnihna a rawn nihpui a, pathumna chu Zaii Hauchhum hla hit 'Nghilh har di hmasa' kha a ni thung.

Jojo hian a hla tho 'Tawnthar D' chu pariatna a nihpui mek bawk.

Lilzo-a'n hma a sawn zel
Lilzo chuan a hla 'Kawplai I nei leh si' chu hma sawnpui zelin palina a rawn nihpui tawh. Kar hmasa lamah khan parukna a ni a, tunah chuan palinaah rawn inhlangkai tawhin hma a sawn chak hle. Jenny Jathang chuan a hla hit 'Vawi khat tal' hmangin top 5 a khar a ni.

Ṭhazual chart top 10-ah hian Mathlenga, DJ-i, Laithangpuii leh Benjamin Sum-te pawh an lang.