Bollywood Box Office PadMan-in sum lalut hnem ber

Bollywood film chhuak thar, Akshay Kumar channa PadMan chu Bollywood Box Office-a sum lalut hnem ber a ni.

PadMan hi February 9 khan tlangzarh a ni a, Box Office-a a sum lakluh tawh zat chu vaibelchhe 62 a ni. A tirah chuan Republic Day-a tlangzarh tura ruahman a ni a, a hun hmain tihchhuah a ni ta a ni. Tlangzarh aṭangin sum lakluh lamah a chungnung nghal hle a, ni ruk chhung lekin vaibelchhe 59.09 a lalut. Ni khatah vaibelchhe 10 chuangte a lakluh avangin a sum thawhchhuah hi la punbelh viau tura ngaih a ni. He film hi Tamil Nadu lam chhuak social entrepreneur Arunachalam Muruga­nantham chanchin belh­chhana siam niin, Akshay Kumar bakah hian Bollywood star Sonam Kapoor leh Radhika Apte-te an chang a ni.

He fim siam nana budget hi vaibelchhe 70 lai a ni a, Bolly­wood film siam nana sum sen tam berna pawl a ni. Deepika Padukone leh Ranveer Singh-te channa Padmavati chu budget sang ber niin, vaibelchhe 200 sen ral a ni. January 25-a tlangzarh Padmavati hian sum a hailut hnem rem rem hle a, vaibelchhe 265.25 zet a la lut tawh. Bollywood film hit dang Tiger Zinda Hai chuan vaibelchhe 336.95 zet a lalut tawh bawk a, he film siam nana budget hi vbch 150 zet a tling bawk. PadMan hian heng film pahnihte hi sum lakluh tam lamah hian a elphak angem tih chu a hriat thuai dawn a ni.

PadMan hi India khawpui hrang hrangah chhuah chhoh mek zel a la ni a, Assam khawpui Guwahati-ah pawh chhuah a ni dawn. Kolkata leh khawpui lian dangah pawh chhuah chhoh mek zel a ni bawk. Tun hnaiah Bollywood film chhuak tharten sum an lalut hnem zual a, Hollywood em la el pha lo mah se, hmasawnna hmuh tur a tam hle a ni.