Priyanka-i'n Nirav Modi brand nena inzawmna titawp

Priyanka Chopra chuan luxury diamond jewellery brand, Nirav Modi Diamond nena an inzawmna a titawp a, sum leh paiah intih thiam lohna an nei nia tarlan a ni.

Nirav Modi Diamond chuan Indian actress Priyanka Chopra hi global ambassador atan an ruai a, an product tih lar nan an hmang ṭhin. Mahse Priyanka Chopra hnenah hian pawisa an pe lo a, hei vang hian an inremna hi tihtawp a ni ta a ni. Nirav Modi Diamond hian sum tam tak an cheprelh a, Priyanka hnena pawisa pek tur pawh hi pe loin thil dangah an pawt peng nia tarlan a ni. Priyanka thupuangtu chuan inremna an tihtawp thu hi Nigani khan a puang a, an tihtawp chhan kim chang erawh a tarlang lo.

Nirav Modi Diamond hian Priyanka bakah hian Aishwarya Rai Bachchan leh Hollywood star Kate Winslet leh Dakota Johnson-te pawh an lo thawhpui tawh a ni.