Billboard Hot 100 Chart-ah Drake chhing zo an la awm lo

Drake chuan a zawna a vawi thum nan Billboard Hot 100 Chart-ah pakhatna a hauh leh ta. Chart-a dinhmun sang ber a luah rual hian record pawh a siam nghal a, a hla hit God's Plan chu US-ah ringawt kar thum chhungin mi maktaduai 75 in an stream a, hetiang tithei hi an la awm ngai lo.

Nielsen Music-in a tarlan dan chuan Drake hi artist zinga stream hlawh ber pawl niin, a hla thar pawh hian entu a ngah hle. Kar thum chhung lekin mi maktaduai 75 chuangin an stream a, a lar thawkhat hle tihna a ni. Billboard Hot 100 chart-ah pawh a zawnin kar thum chhung pakhatna a luah tawh a, khum thei an la awm lo. God's Plan hian chart hrang hrangah pawh dinhmun sang tak a thleng phak a ni. February 16 khan a official music video chu youtube-ah upload a ni a, mi 9,415,000 chuangin an en tawh bawk.

Tun ṭum chart-a pahnihna chu Ed Sheeran a ni. English singer hian Perfect tih hla chu a hlawhtlinpui zui zel a, chart-ah pawh a lang rei ta malh malh hle. Tun hnaia tihchhuah Bruno Mars leh Cardi B te sak Finesse chu a sang pathum zingah a inhlangkai a, a hnuaiah hian Camila Cabello leh Young Thug te an awm. Post Malone leh 21 Savage te chu panga-naah an awm bawk.

English singer Dua Lipa chu nikuma a tihchhuah 'New Rules' hmangin top 10-ah a lang a, The Weeknd leh Kendrick Lamar te chungah a awm. American hip hop trio Migos chu pariatnaah an awm. Top 10-ah hian Bebe Rexha leh Florida Georgia Line te bakah, American singer Halsey a lang bawk. Bebe leh Florida te hian an hla hit 'Meant to Be' hi Country Song chart-ah pawh kar 11 chhung zet pakhatna an nihpui tawh a, hmeichhe artist zingah hetiang tithei hi an la awm lo a ni.