Sawi zawm hlawh Jennifer Aniston leh Brad Pitt

A pasal nena an inṭhen avanga chanchin ngah tak American actress Jennifer Aniston chu a pasal hlui Brad Pitt nen sawi zawm an ni leh mek. Anni pahnih hi hun eng enaw chen lo innei tawh an nih vang leh, tun dinhmunh kawppui nei loa an awm ve ve bawk avangin sawi zawm an ni pawh hi a mak lo.

Jennifer Aniston leh Justin Theroux te chu tun hnai khan an inṭhen a, kum hnih leh a chanve awrh chauh an inkawl hman. An inṭhen chhan hi tarlan a ni lo a, an inrinsiak vel mek. An chanchin hian sawi a hlawh a, tun lai khawthlang media te chaw tui ber pakhat a ni mek. Hetiang a nih mek lai hian mi ṭhenkhat chuan Brad Pitt hming an lam ri leh tawh a, Jennifer nena inkawp leh tura an duh thu thlengin an sawi. Jennifer leh Pitt te hi inkawp se, Theroux leh Pitt-a nupui hlui Angelina Jolie te chu inkawp ve mai turten an lo ruahman sak pek bawk!

Brad Pitt leh Angelina Jolie te hi kum eng emaw zat an inneih hnuah kum 2016 khan an inṭhen a ni. An inkawp leh angem tih pawh hriat a nih loh lai hian, Jennifer Aniston te an lo inṭhen ve takah chuan Pitt hi a nupui hlui nen hian sawi zawm an ni leh ta a ni. Pitt leh Jennifer te hi kum 2000, July thla khan an innei a, October 2005-ah an inṭhen leh. A hun laia milar inkawp fuh ber pawla sawi ni mah se an inkawl rei lo hle a ni. Tunah pawh sawi zawm leh nghal an ni a, mi tam tak chuan an inkawp hi hmuh leh an chak a ni.

Hetih lai hian Brad Pitt hi Jennifer Lawrence nen nikum tawp lam khan sawi zawm an ni a, kum 21 mi lek English actress Ella Purnell nen an inzui nia sawi a lo awm tawh bawk.