Box Office : Zalen takin 'Free Guy' pakhatnaah

Box Office-ah Ryan Reynolds channa 'Free Guy' chu sum lalut tam ber a ni a, film tlangzarh thar 'Don't Breathe 2' chu pahnihna niin 'Jungle Cruise' chu pathumna a ni thung.

'Free Guy' a zalen viau mai
Science fiction action comedy film, Ryan Reynolds leh Jodie Comer-te channa 'Free Guy' chu kar liam ta Zirtawpniah khan US-ah tlangzarh a ni ta a, hripui leng karah theatre 4,165 laiah chhuah niin $28,365,416 lai sum a lalut. Ram dang aṭanga a sum lakluh nen $50,865,416 lai sum a lalut tawh.

Pahnihna 'Don't Breathe 2' nen an sum lakluh a inthlau a, $mtd 100–125 vel senga an siam film hi budget an hmuh chhuah har a rinawm loh.

An tlangzarh hlim hlawt a, tlangzarh ni aṭangin ni khat chiah a liam tihah a chhunzawmna tur chungchang sawi rikin a awm nghal a, Ryan Rynolds chuan Twitter lamah Disney lamin chhunzawmna siam an duh thu a sawi nghal der.

He film-ah hian film director lar Taiki Waititi pawh a inlan a, Stranger Things star Joe Keery pawh a chang ve a ni.

Nikum July thla tira tlangzarh an tum tawh zawk kha a ni a, mahse hripui leng vangin tlangzarh hun an sawn hla zel a, Zirtawpni liam ta khan an tlangzarh ta a ni.

Pahnihna 'Don't Breathe 2', pathumna 'Jungle Cruise'
Kum 2016-a tlangzarh 'Don't Breathe' chhunzawmna, 'Don't Breathe 2' chu Zirtawpni liam taah khan tlangzarh niin Box Office-ah pahnihna a ni. He film-ah hian Stephen Lang chu chang lehin Brendan Sexton III leh Madelyn Grace-te nen an chang ho a ni.

Kar tawp liam taah khan theatre 3,005 aṭangin $10,622,473 a lalut.

Kar hmasa lama pahnihna 'Jungle Cruise' chuan $9,123,807 lalut lehin pathumna a ni thung.

Film thar a awm nual
Palina 'Respect' pawh film thar bawk a ni a, kar hmasa lama pakhatna 'The Suicide Squad' chu panganaah a tla thla daih a ni.

Raging Fire (17), The Lost Leonardo (28), Ema (30), The Meaning of Hitler (32) leh The East (43) te chu film thar a ni bawk.