Dune 2 sawi rikin a awm der mai; Role pawimawh zawkah Zendaya

Kumin October 22-a tlangzarh tur, film thawm nei ring tak 'Dune' chu tlangzarh a nih hma hauhin a chhunzawmna chungchang sawi rikin a awm leh der tawh.

Directed Denis Villeneuve chuan 'Dune' chhunzawmna tur atan ruahmanna a siam fel leh tawh tih sawiin Zendaya character Chani chu role pawimawh tak a ni lehzual dawn tih a sawi.

Tuna an tlangzarh tur a film hmasa zawk hi chu Timothée Chalamet-a'n a lem a chan Paul Atreides chanchin a ni deuh dawn a, a chhunzawmna erawh Zendaya character Chani chanchin a ni thung dawn niin Denis Villeneuve chuan a sawi a ni.

Part 1-ah hi chuan Paul Atreides chu khawvel hlauhawm takah a zin dawn a, chu chu a mite leh a chhungte hmalam huna an himna tur atana a tih a ni.

Italian magazine Il Venerdi di Repubblica-in an kawmnaah Denis Villeneuve chuan "Dune chhunzawmna chan leh hlan hi ka nghakhlel hle a ni," a ti a, "A chhunzawmnaah chuan Zendaya chu thawnthu laimu kengtu a ni tawh thung ang," tiin a sawi bawk.

Dune hi ruahmanna hmasaah chuan nikum lama tlangzarh tura an tih tawh kha a ni a, mahse Covid-19 hripui leng vangin October 22 hian an cinema leh HBO Max lamah an tlangzarh thei dawn chauh a ni.

Villeneuve hian Dune hi a film siam tawhah a la ṭha ber tihte pawh a lo sawi tawh bawk.