Box Office-ah Black Panther inlar Sum lakluh tam lamah record siam

Fantasy/Science fiction film Black Panther chuan North America Box Office-ah hneh takin ro a rel mek a, sum lalkuh tam lamah record a siam bawk. Kar liamta chhung khan US-ah ringawt Dollar maktaduai 202 zet lalutin, February thla chhunga sum lalut hnem ber a ni nghal.

Black Panther hi January 29 khan tlangzarh a ni a, Febraury 16 aṭang khan North America lamah chuan chhuah a ni ve chiah. US lamah hian en a hlawh hle a, ticket pawh hralh a kal hle a ni. Kar khat lek chhunga a sum lakluh hi a namai lo hle a, tlangzarh kara sum lakluh tam lamah pawh a sang pawl a ni. A tluk lohte chu The Avengers, Star Wars: The Force Awakens leh Star Wars: The Last Jedi-te chauh an ni a, Deadpool pawh a khum a ni.

US-ah hian February thlaah film chhuak thar a tam ngai lem lo a, sum leng pawh thla dang angin a tam lo. Kum 2016-a tlangzarh Deadpool hi February tlaa tihchhuah zinga sum lalut hnem ber niin, $mtd 132 a la lut. Hei hi Black Panther hian a rawn khum ta a, a khum sa tlian pawh ni mai loin, khum leh harsa khawpin a chepui a ni. A sum lakluh zat hi Presidents Day weekend nena chhiar tel phei chuan $mtd 235 a tling phak dawn a, hetih chhung veka Deedpool sum lakluh zat chu $mtd 152.2 a ni.

Sum lalut tam pahnihna chu tun thlaa tlangzarh tho adventure film Peter Rabbit a ni a, a sum lakluh zat chu $mtd 17.6 a ni. Fifty Shades Freed chu sum lalut tam pathumna niin, Peter Rabbit nen an sum lakluh a inthlau lo hle. Top 3-te sum lakluh hi a sang fal hle a, Fifty Shades Freed pawh hian $mtd 17.3 zet a lalut a ni. Jumanji: Welcome to the Jungle chuan $mtd 7 lalutin, The 15:17 to Paris-in a dawt. The Greatest Showman pawh sum lalut tam zual zingah tel lehin, Maze Runner: The Death Cure chu top 10-ah a lang bawk.