Vanthengrengah car kapchhuak
SpaceX co-founder leh CEO ni bawk Elon Reeve Musk chuan February 6 khan rocket hmangin Tesla car an tih chu vanthengrengah a kapkai a, he car hi van boruakah hian kum maktaduai 10 vel a awm thei dawn nia tarlan a ni.
Musk hi engineer niin, South African-a piang a ni a, Canada leh America khua lehtui nihna nei a ni. Thil siam chhuah lamah a chungchuang hle a, tun hnai khan van lama thil rit tak tak phur chho thei tur Falcon Heavy a tlangzarh. Hei hi a company din SpaceX siam ngat niin, avawi khat nan kahchhuah a ni. He launcher hian Tesla car an tih hi vanthengrengah phur chhoin, kum tam tak chhung a thlawk kual dawn a ni. Tesla hian kan awmna lei hi a hel ang a, kum 30 danah a hnaih tial tial dawn a ni. Leiah a lo kir thei a, a nih loh vekpawhin a kang ral vek dawn nia tarlan a ni bawk.
Mithiam te chuan he car hian kan awmna lei leh Venus pawh a su palh thei niin an sawi a, chance erawh a tlem hle tih an sawi. Van boruaka a thlawh kual nasat dan a zirin Ni pawh a su palh thei a, Mars nen erawh insutna chance a awm lo niin an sawi. Tesla sports car hian van boruakah hian enge a tih dawn a, eng atana hman tur nge tarlan a ni lo. Hetih rual hian orbit chu vawi 240 vel a helchhuak thei dawn a, hemi atan hian kum maktaduai 3.5 vel a ngai dawn thung. University of Toronto-a assistant professor Dr Rein chuan Telsa car hnathawh hi zirchian zel a ni dawn a, tunah chuan engmah sawi lawk theih a awm lo niin a sawi.
SpaceX hi rocket zingah chuan chak leh rintlak ber pawl tura ngaih a ni mek a, khawvela ram hausa ten an ngaihven hle. China chuan a ngaihven zual nia sawi a awm bawk. A siam chhuaktu Elon Reeve Musk hi Forbes chuan kum 2016-a khawvela mi hausa zual an thlan chhuahah khan 21-n a ni.