Billboard 200 Chart-ah pawh Black Panther bawk : Album hralh kal ber Black Panther : The Album

Box Office-a sum lalut hnem ber chu Black Panther a ni a, Billboard 200 Chart-a pakhatna pawh Black Panther tho a ni. Black Panther : The Album chu February 9 khan US-ah tlangzarh a ni a, Billboard chart-ah roreltu a ni nghal chat.

He album-ah hian hla 14-a awm a, kar khat chhungin copy 154,000 hralh chhuah a ni. Black Panther sound track hi Interscope Records kaltlangin tlangzarh a ni a, traditional album sales (copy 52,000), track equivalent albums (copy 9,000) leh streaming equivalent albums (copy 93,000) aṭanga an hralh chhuah zat hi a tam tham hle. Hetih rual hian Kum 2016-a tlangzarh Suicide Squad a la pha chuang lo a, Suicide Squad: The Album hi tlangzarh karah copy 182,000 hralh chhuah niin, a hit rem rem hle.

Black Panther album-a hla satu te zingah hian zaithiam langsar tak tak an kat nuk a, chung zingah chuan Kendrick Lamar, The Weeknd, SZA, Khalid leh James Blake-te pawh an tel. Heng zaithiam te hi mahni pawha Billboard chart-a dinhmunnsang luah pha an nih nawk avangin, Black Panther album-in No. 1 a hauh pawh hi a awm viau a ni. Khawvel hmun danga an hralhte nen chuan copy maktaduai 138.9 zet hralh chhuah tawh a ni. Chart-ah hian Greatest Showman soundtrack pawhin hun eng emaw chen chu pakhana hi a lo hauh ve tawh bawk.

Tun ṭum chart-ah hian Justin Timberlake chu pahnihna a ni a, a album hit tak mai 'Man of the Woods' chu hralh a la kal zui zel. Kar khat chhungin copy 74,000 hralh chhuah niin chart-ah a lang rei ta viau. The Greatest Showman soundtrack chuan No. 3 hauhin, copy 72,000 lai hralh chhuah ni mah se, a tlakhniamna hi 10% lai a tling tawh a ni.

Migos album 'Culture II' chu pahnihna aṭangin palina-ah a chhuk ve bawk a, Fifty Shades Freed soundtrack chuan a dawt. Fifty Shades original album-a hlate hi Liam Payne, Rita Ora, Julia Michaels, Jessie J leh Sia-ten an sa a, kar liam ta chhung khan copy 58,000 hralh chhuah a ni. Fifty Shades Darker leh Fifty Shade of Grey-te pawh chart-ah hian an lo thleng sang tawh viau bawk.

Ed Sheeran album Divide pawh hralh ala kal zui zel a, Bruno Mars album hit 24K Magic pawh hralh kal pawl a la ni. Chart-a hun eng emaw chen lang tawh Post Malone pawh a sang 10 zingah a tel leh a, a ni bakah hian Kendrick Lamar leh Camila Cabello-te pawh an lang bawk.