Godfather of Sudoku Maki Kaji a thi

Godfather of Sudoku tia hriat lar Maki Kaji chu kum 69 mi niin August 10 khan bile duct cancer vangin a thi.

Maki Kaji hi number puzzle 'Sudoku' hming phuahtu a ni a, chumi a nih avang chuan 'Godfather of Sudoku' tia hriat lar a nih chhunzawm ta a ni.

Thawhṭanni khan Nikoli Co., Ltd chuan thuchhuah siamin August 10 khan Kaji chu Tokyo-a a chenna inah a thi ta tih an puangzar chauh a ni.

Sudoku game lo chhuahna chiah hi hriat a ni lo a, mi ṭhenkhat chuan kum zabi 18 hunlaia Swiss mathematician Euler-a duan chhuah nite'n an ngai a, ṭhenkhat erawh chuan Arab, China leh India ramahte kum zabi 8 leh 9 hunlai khan an khel tawh nitein an sawi ve bawk.

French chanchinbu 'La France newspaper 'chuan kum zabi 19-na tawp lamah khan Sudoku game version hmasa zawk chu an lo dahtel tawh ṭhin a, kum 1895 velah pawh khan khelh theih turin an lo chhawp chhuak daih tawh.

Tunlai Sudoku game ang chi, modern Sudoku hi chu US architect Howard Garns duan chhuah nia sawi niin, 1970's chho khan a duang chhuak niin an sawi a, 'Number Place' tiin a tirah chuan an sawi ṭhin. Chu chu Kaji hian lo hre fuhin 1980's khan a magazine Nikoli-ah Sudoku tih hmingpuin a dah ta a, chuta ṭang chuan khawvelin Sudoku tiin kan hre ta a ni.