'Spencer' November-ah

Kristen Stewart-in Princess Diana lem a channa film, 'Spencer' chu November thlaah hian tlangzarh a ni dawn.

A tirah tak chuan Diana boral champha kum 25-na hriatrengna tur ni pah fawmin nakkum lama tlangzarh an tum a, mahse film siamtu lam chuan November 5 hian an tlangzarh dawn ta zawk a ni.

'Spencer' hi Marvel film 'The Eternals' bakah Chloé Zhao leh Tom Hanks-te sci-fi film 'Finch' te nen an tlangzarh rual dawn.

He film-ah hian Kristen Stewart chu Diana Frances Spencer lemah a chang a, 'Peaky Blinders' creator Steven Knight chuan script a ziak a ni. Jack Farthing chu Prince Charles lemah a chang ve bawk.

Timothy Spall, Sean Harris leh Sally Hawkins-te pawh he film-ah hian an inlan dawn bawk a ni.

Hetihlai hian Netflix series 'The Crown' season 5-a Elizabeth Debicki 'Princess Diana' lema a inlan dan tur hlimthla chu Thawhṭanni khan tlangzarh a ni ve bawk a, he series-ah hian Debicki chuan Emma Corrin thlakin Diana lem hi a chang a ni.