Studio-ah Ed Sheeran a lut leh ṭan
'Perfect' hitmaker Ed Sheeran chu Divide Tour a neih zawh hnua hun eng emaw chen a chawlh hnuah Jeremy Loops album thar buaipui mek pui turin studio lamah a lut leh ṭan tawh.
Ed Sheeran hian nikum December khan Divide Tour a neih zawh hunah hun eng emaw chen music a chawlhsan rih dawn tih a lo sawi tawh a, mahse zaithiam lar chho mek Jeremy chuan a record thar buaipui mekah Sheeran hian studio lamah a luhpui tih a sawi thung.
South African singer Jeremy chuan The Sun chanchinbu hnenah hemi chungchang hi hrilhin nilenga hla hrang hrang buaipuia hna an thawh thu a sawi a ni.
"A duh apiang a thawhpui thei a, min thawhpui duhna a nei hi thil lawmawm tak a ni." tiin Sheeran chungchang hi a sawi zui bawk.
Jeremy hian a album pathumna tur a buaipui mek a, kum 2014 leh 2018 khan album a tichhuak tawh a ni.
Kum 29 mi Ed Sheeran hian album pali a tichhuak tawh a, 'Divide Tour' a neih zawh hnu khan rimawi khawvelah a la inlan leh rih lo a ni. 'Divide Tour' kha March 2017 leh August 2019 inkarah neiin khawvela tour hlawhtling ber a ni hial a, show 260 neiin khawvela tour buatsaih tawh zawng zawnga lian ber, chhimtu ngah ber leh sum lalut tam ber a ni.