Chi inthliarna dona kawngah milarte an che chhuak zel Jennifer Aniston-in $mtd 1 a thawh

George Floyd thihna avangin US leh khawvel ram hrang hrangah chi inthliarna duh lohna nasa taka lantir a ni a, hemi kawngah hian milarte pawh an che chhuak nasa hle.

'Friends' star Jennifer Aniston chuan chi inthliarna dona atana hman turin $maktaduai 1 lai a thawh a, Color Of Change hnenah sum tam tham tak hi pein a thilpek pek chungchang hi Sunday Mirror chuan a tarlang a ni.

"Midang ang bawkin America rama thil thleng mek leh vun rawng vanga rorelna dik lo awm ṭhin hian Jen hi a nghawng a ni. A thlawpna lantir a duh a, chumi vang chuan charity-a hman turin sum tam tham tak a rawn thawh a ni," tiin an ziak.

Jennifer Aniston hian a hmain chi inthliarna leh rorelna dik hi a lo auchhuahpui tawh a, instagram lamah pawh a fan-te chu hemi kawnga che chhuak tur leh pawisa thawh tur hian a lo ngen tawh a ni.

Blackout Tuesday a thlawpzia lantirna pawh Instagram lamah a lo tarlang tawh a ni. IG hi Aniston-i'n record a lo siam tawhna kha a ni a, account a siam tirh khan follower a ngah chak bakah follow duh an tam lutuka internet khawvel a chawk buai hial a nih kha!    

'Tomb Rider' star Angelina Jolie pawhin National Association for the Advancement of Colored People (NAACP) hnenah a piancham pualin $200,000 a pe.

Angelina Jolie hian kar liam ta Ninganni khan kum 45 a tling a, hemi pual hian Black Lives Matter movement a thlawp zia lantirna atan leh George Floyd-a thihna duh lohna lantirna ni pah fawmin NAACP hnenah hian sum tam tham tak hi a pe a ni.

Entertainment Tonight hnenah hemi chungchang hi sawiin, "Dikna chanvo hi pawl leh mimal ang pawh nise midang hnena hlan chhawn chi a ni lo. Inthliarhranna hi ngaihzam theih a ni lo a, sawifiaha tihdik theih pawh a ni lo. Chi inthliarna dona kawngah te, intluktlanna leh social justice kawngah hian NAACP Legal Defence Fund hi ka thlawp a ni," a ti.

NAACP hnenah hian Angelina Jolie bakah hian Ryan Reynolds leh Blake Lively-te nupa pawhin tunhnai lawk khan $200,000 tho hi an lo pe ve tawh bawk.

K Pop star BTS leh an record label Big Hit Entertainment chuan Black Live Matter thlawpna turin $mtd 1 an pe.

Variety chuan Inrinni khan hemi chungchang hi an tarlang a, Nilaini liam taah pawh khan an band twitter account-ah Black Lives Matter movement an thlawp thu hi thuchhuah siamin an lo tarlang tawh bawk.