Kumin chhunga UK-a album hralh kal ber 'Chromatica'
Lady Gaga-in hmanni lawka a tlangzarh 'Chromatica' album kha kumin chhunga UK-a album hralh kal ber a ni der tawh a, UK chart-a No.1 a nihpui theih album palina a ni chiah bawk.
Chromatica hi vinyl record pawh a tichhuak a, kumin chhunga vinyl record hralh hnem ber a nihpui nghal bawk a ni.
UK-ah ringawt hian equivalent sales units 53,000 a hralh tling a, hei hi chart top 10-a a lanpui dangte album hralh belhkhawm ai pawhin a tam zawk. Gaga album thara hlate pawh hi a hlawhtling nghal hle hlawm a, Ariana Grande nena an sak dun 'Rain on Me' chu UK Single chart-ah No.1 a lo ni tawh a, Blackpink nena an sak 'Sour Candy' chu 17-na niin 'Alice' chu 29-na a ni bawk.
Chromatica hi April 10 a tlangzarh a tum hripui len vanga May 29-a a tlangzarh tak kha a ni a, dance-pop, synth-pop leh electropop album niin rilru hriselna, depression, mal taka awm nia inhriatna leh hun harsa tak kara hmangaihna zawnna lam hla a ni tlangpui hlawm. Ariana Grande leh Blackpink bakah hian Elton John pawh a thawhpui a ni.
'Rain on Me' a hit
Lady Gaga leh Ariana Grande-te'n an sak dun 'Rain on Me' chu a hit chho zel a, Billboard Streaming Songs chart-ah pawh a che ṭha hle.
'Rain on Me' hi tlangzarh a nih karah khan US-ah chuan maktaduai 31.4 lai stream a ni tih Nielsen Music/MRC Data chuan a tarlang. Hei vang hian kum 2013-a 'Dope' a tihchhuah hnua a hla streaming chart-a a chet ṭhatpui ber a ni hial. YouTube lamah pawh thlir a hlawh hle a, kar hnih chhungin thlirtu maktduai 89 an awm tling tawh bawk.