Bollywood mi ropui Sridevi a fam ta

Indian legendary Bolly­wood actress Sridevi Kapoor chu February 24, Inrinni khan lungphuchawlin Dubai-ah a thi a, kum 54 mi a ni.

Sridevi hi a chhungte nen Dubai-ah inneih hmangin an kal a, a thih hian a chhungte ṭhenkhat chuIndia-ah a let tawh. A pasal Boney Kapoor leh an fanu Khushi-te nen dubai-ah hian an cham a, Inrinni zan dar 11 vel khan cardiac arrest-in a thi ta thut a ni.

Tamil Nadu lam chhuak Sridevi thih thu hian Bollywood a dengchhuak hneh hle.

Sridevi hi August 13, 1963 khan Shree Amma Yanger Ayyapan tih hmingpuiin Sivakasi, Madras-ah a piang a, Sridevi Kapoor tia hriat lar a ni zui ta ni.

Kum 15 mi lek a nihin 'Judaai' ah a inlan a, he filmah hian Anil Kapoor leh Urmila Matondkar-te pawh an inlan. Kum 1978 aṭangin Bollywood-ah a zuanglut a, 'Solva Sawan' film a chan aṭangin hriat a hlawh chho ṭan.

Jeetendra nena an chan dunna 'Himmatwala' chu a hun laia Bollywood film lar ber pawl a ni a, sum lakluh kawngah pawh a hlawhtling hle. Hindi film industry-ah chuan sum lalut hnem pawl a ni chho nghal a, hmeichhia bikah chuan kum 1980 chho khan sum laluthnem ber a ni hial.

Kum 1983-a tihchhuah 'Mawaali'-te, 'Tohfa' (1984), 'Mr India' (1987) leh 'Chandni' (1989)-te chu a channa langsar zual a ni. Heng bakah hian 'Sadma' (1983), 'ChaalBaaz' (1989), 'Lamhe' (1991) leh 'Gumrah' (1993)-te chu a hun laia lar tak tak vek an ni.

Bollywood fanu rangkachak
Kum 12 mi lek a nih lai, 1975 khan Bollywood-a a film hmasa ber chu a chang a, he tih lai hian child artist a la ni. Kum naupangte ni chung hian Tamil film 'Moondru Mudichu'-ah a inlan leh a, a thih ni thleng hian Bollywood khawvelah a hming a dai tawh lo - film 250 chuangah a inlan.

Bollywood fanu rangkachak hian khawvel chhuansanin, a lei taksa hmuh tur awm tawh lo mah se a sulhnu leh hlimthla te avangin a hming hi a dai tawh ngai dawn lo a ni.

Sridevi hi kum 15 zet film a chan tawh loh hnuin kum 2012 khan a inlar leh a, 'English Vinglish' film-ah a chang. A lo hlawhtlin tawhna film industry chhuahsan mai loin, nikuma tlangzarh drama film 'Mom' ah pawh khan a la inlan a ni.

Hei mai hi a la ni lo a, kumin December thlaa tlangzarh tura tih 'Zero' ah pawh Bollywood superstar Shah Rukh Khan nen an chang dun a ni. Hei hi film a chan tawpna ber tawh tur nia sawi a awm lai mekin, vanduaina a tawk ta a ni.

Sridevi hi South Indian film eng emaw zatah a lo inlan tawh a, Malayalam, Telugu leh Kannada film-te pawh a chang nual tawh bawk.

Award dawn tawh
India rama film lama chawimawina sem ṭhin zinga ngaihhlut ber pawl Filmfare Award chu panga zet a lo dawng tawh. Filmfare Award for Best Actress atan ṭum li zet thlan a lo ni tawh a, Filmfare Special Jury Award hlan a lo ni tawh bawk.

Kum 2013 khan India sorkar chuan a khua leh tuite hnena chawimaiwna sang a pek ṭhin zinga pakhat 'Padma Shri' chu Sridevi hnenah hian a lo hlan tawh bawk. Heng bakah hian award dang eng emaw zat a lo dawng tawh a, mimal chawimawina a dawn tawh pawh chhiar tham fe a tling tawh bawk.