John Mayer-a'n album thar a sawi ri

John Mayer chuan Instagram-a a fan-te puala hun a hman ṭhin Current Mood chu hun eng emaw chen a neih tawh loh hnuah an ram huna Pathianni zingkarah khan a nei leh a, hetah hian thil hrang hrang a sawi zingah album thar a buaipui thu a sawi ri a, hei hian a fan-te beng a verh nghal hle.

December thla aṭang khan Current Mood hi a tichhuak tawh lo a, hemi chungchang a sawinaah hian record thar a buaipui vang a nih thu a sawi a, hei hian a fan-te a tilawm hle. Social Media khawih loh a duh vang ni loin record thar a buaipui vang zawka a thawm a reh tih thu a sawi chuan a comment-tu fan-te pawh an phur hle a ni. "Record hi tihchhuah a nih hunah chuan, in ngainat ber a nih loh pawhin in ngainat loh ber tal chu a ni ang," tiin fiamthuin a sawi zui bawk.

Current Mood-ah hian Mayer hian anxiety leh Covid-19 chungchangte pawh a sawi lang bawk a ni. A Current Mood programme hman ṭhinah hian milar tam tak inlan an awm tawh a, chung zingah chuan Halsey, Gigi Hadid leh Shawn Mendes-te pawh an tel. July thla aṭang hian tuna a zui mek Dead & Company band chuan summer tour an nei leh dawn bawk a ni.