LPS leh Zonet ṭangkawp buatsaih FAIRELBEL - Zaninah

LPS leh Zonet ṭangkawp chuan Aizawl Municipal huam chhunga hrileng avanga mi chanhai zawkte ṭanpuina hun "Fairelbel" chu zaninah hian buatsaih a ni dawn.

He programme aṭanga sum hmuhte hi a bo abang awm loin AMC huam chhunga LLTF-te hnenah Aizawl DC office kaltlangin an hlan ang.

Covid- 19 hrilen hnuah hian CMRF aṭang hian chhungkaw 20,377 ṭanpui an ni tawh a, Mizoramin hrileng thawh hnihna a hmachhawn leh mekah hian mi tam tak nitin nunphung leh eizawnna kawnga tlu chhia, leiba rulh ngai rilru hrehawm taka awm mi ṭhahnem tak an awm tak avangin LPS leh ZONET ṭangkawp chuan heng mite tan hian charity program hi a buatsaih dawn a ni.

He program-ah hian Frederick Lalrindika, Jeje Lalpekhlua, Vanlalsailova, Benjamin Sum, Sangtei Khuptong, Fiona Pachuau, K. Hminga, Henry Varte, Adeline Pachuau leh Rini Hlondo-te'n hun an hmang ang.

Zan dar 8-a ṭan tur a ni a, LPS 1, Zonet Zawlbuk leh YouTube lamah LIVE a pek chhuah a ni dawn a ni. Online payment-in awlsam takin a pek theih dawn a, LIVE Phone-In hmangin milarte hi biak theih an ni bawk ang.

LPS leh Zonet chuan tlem lua tam lua awm loin he program kaltlang hian lo luang chhuak ve turin chhiartute an sawm a ni.