Adult Alternative Airplay Chart topper John Mayer

Hmanni lawka album thar 'Sob Rock' tlangzarhtu John Mayer chu Billboard Adult Alternative Airplay chart-ah a hla 'Last Train Home' hmangin pakhatna a ni.

2000's chhoah khan John Mayer hlate chu he chart-ah hian an lun ve ṭhin hle a, kum 2009 kum tawp lamah khan a hunlaia a hla hit 'Who Says' hmangin kar ruk chhung lai he chart-ah hian pakhatna a ni a, chumi hnu lamah erawh chuan a reh zui ta a; kum 10 chuang zet hnuah pakhatnaah a rawn inhlangkai ve leh ta a ni.

'No Such Thing' hmang khan kum 2001-ah he chart-ah hian a vawi khatna atan ro a rel a, tunah hian Billboard Adult Alternative Airplay chart-a rorel tam ber zinga mi a ni tawh.

'Half of My Heart', 'Shadow Days' leh 'Queen of California'-te kha he chart-ah hian inlanpui ve bawk mah se pahnihna aia sang a thlenpui hlawm lo thung.

John Mayer hian a studio album pariatna Sob Rock kha Billboard 200 chart-ah pahnihna a nihpui a, Album Sales chart, Top Rock Album leh Americana/Folk Albums chart-ahte chuan topper a nihpui thung.

Adult Alternative Airplay Chart-a topper ni ngun ber chu Coldplay leh U2 an ni a, vawi 13 an hlate pakhatna an nihpui tawh. Dave Matthews (solo and with Dave Matthews Band) chuan dawtin vawi 11 a ni tawh a, Jack Johnson chu vawi 10 ni tawhin Counting Crows, Sheryl Crow, John Mayer leh R.E.M-te chu vawi sarih ṭheuh an ni ve tawh bawk.

John Mayer hian nizan hmasa khan music video thar 'Wild Blue' a tichhhuak bawk a, he hla pawh hi a album thara mi bawk a ni.