Captain America 4-ah Anthony Mackie a chiang ta

Captain America 4-ah chuan rin lawk ang ngeiin Anthony Mackie chuan Captain America 'shield' a keng dawn tih a chiang ta.

Deadline chuan hemi chungchang hi tarlang hmasa berin Marvel leh Anthony Mackie chuan inremna pawh an ziak fel tawh niin an tarlang a, chumi hnuah chuan media hrang hrangin an rawn tarlang zui ve nghal a ni.

Anthony Mackie hi kum 2014 aṭang khan MCU-ah inlan ṭanin Sam Wilson (Falcon) lemah a chang a, 'Captain America: The Winter Soldier' film aṭang khan a inlan ṭan a ni. Chumi zawhah chuan inlan chhunzawm zelin MCU film dang pangaah he role hi chan chhunzawmin 'Avengers: Endgame' tawpah khan Chris Evans-a 'Steve Rogers' khan a 'sheld' kha a kutah a hlan chhawng a nih kha.

Captain America 4 hian official title a la nei lo a, 'The Falcon and the Winter Soldier' head writer leh creator ni bawk Malcolm Spellman chuan script a ziak dawn a ni.