Sridevi ruang endik a nih hnuah India-ah letpui

Bollywood actress lar Sridevi Kapoor ruang chu endik zawh a nih hnuah nimin khan India-ah letpui a ni a, Mumbai panpui a ni. Sridevi hi nimin khan vui nghal tura tih a ni a, mahse he chanchin buatsaih lai hi chuan thu chiang kan hre hman lo a ni.

Kum 54 mi Sridevi hi February 24, Inrinni khan Dubai-ah lungphuchawlin a thi thut a, a pasal leh a fate pahnih a kalsan a ni. Dubai-ah hian a chhungte nen inneih hmangin an kal a, a pasal fanaute nen an cham khawtlai laiin vanduaina a tawk ta a ni. A thih thu hian Bollywood khawvel a dengchhuak nghal a, amah ngainatute a barakhaih hle. A ruang hi Dubai-ah hian endik nghal a ni a, nimin khan Reliance Infrastructure-a an chaimar Anil Amban-a aircraft hmangin Mumbai panpui a ni. Nimin vek khan vui liam nghal tura tih a ni a, mahse a chhungte lam chuan engmah an la puang lo thung.

Media-te tarlan dan chuan Sridevi pasal Boney Kapoor chu Dubai an thlen hnu hian India-ah a let leh a, Inrini tlai lam khan Dubai pan hian a thlawk let leh. Boney hian a nupui hi hrilh lawk lem loin zanriah a kilpui a, room-ah minunte 15 vel an inkawm hnuah a chhuahsan leh. Hemi hnu hian Sridevi hi bathtub-ah che lo chang loin a awm a, hei hi Boney hian va hmuin kawngkhar pawh a tichhe hial nia sawi a ni. Mahse Sridevi hi a lo chau tawh hle a, emergency service pawh koh nghal ni mah se chhan hman a ni ta lo niin an sawi.

Sridevi hi Bollywood huangah chuan mi langsar ber pawl a ni a, film channa aṭanga sum lalut hnem ber pawh lo ni tawh a ni. Lainattu leh uitu pawh a ngah hle a, Bollywood star tam takin amah an uina thu an sawi uar hle.