Kids' Choice Award 2018 nominee puan a ni ta : Music-ah Taylor Swift, movie huangah The Rock langsar

Kids' Choice Award chu March 24 khian California-ah sem a ni leh tawh dawn a, nominee pawh puan a ni tawh.

Music lamah Taylor Swift a langsar a, film lamah American actor Dwayne "The Rock" Johnson a langsar thung. Nikum lama film tlangzarh zinga Box office-a che ṭhate an langsar a, chutiang bawkin music lamah pawh Billboard lama langsar te an lang hnem bawk.

Media company Nickelo­deon chuan tun hnai khan nominee hi an puang a, movie lamah chuan Jumanji : Welcome to the Jungle leh Guardians of the Galaxy Vol. 2-te an langsar a, category panga-ah award dawng thei tura chhawpchhuah an ni. Jumanji star Dwayne "The Rock" Johnson chu Favorite Movie Actor category-ah a hminga chuang vang a, award dawng thei turin a dinhmun a ṭha hle. He tih rual hian a khingpui turte hi an hrawl hlawm hle a, Justice League, Chris Hemsworth leh Guardians of the Galaxy star Chris Pratt-te an ni nawk. Anni bakah hian Jamanji-a a chanpui Kevin Hart leh Daddy's Home 2 star Will Ferrell-te pawh an la awm cheu a ni.

Nikuma film chhuak lar zual - Beauty and the Beast, Star Wars: The Last Jedi leh Wonder Woman-a a changtute pawh an langsar hlawm viau a, Pitch Perfect 3 leh The Greatest Showman star-te pawh an hming hmuh tur a awm. Heng bakah hian Justice League leh Thor: Ragnarok changtute te an langsar viau bawk.

Category ngaihven hlawh Favorite Movie Actress-a hming langte pawh an lang­sar a, Beauty and the Beast star Emma Watson-te, Daisy Ridley, Gal Gadot leh Spider-Man: Homecoming star Zendaya Coleman-te an ni nawk. Favorite Animated Movie nominee zingah Captain Underpants: The First Epic Movie, Cars 3 leh Box Office-a sum lalut hnem Coco-te chu chawpchhuah an ni bawk.

Music lamah American singer Taylor Swift chu Favorite Female Artist award dawng thei turin a dinhmun a ṭha viau. Taylor swift hi category pathumah a hming chhawp chhuah a ni. Favorite Female Artist category-a a khingpui turte hi Beyonce Knowles, Demi Lovato, Katy Perry, Pink leh Selena Gomez-te an ni.

Music lamah hian Asia aṭang pawhin BTS-te chu award dawng thei tur zingah an tel.

Nikum leh kumin lama award eng emaw zat lo dawng tawh Bruno Mars pawh a hming a langsar leh viau a, ani bakah hian Ed Sheeran, Kendrick Lamar, Camila Cabello, Cardi B leh Harry Styles- te hming pawh a ri ring viau bawk. Tunlai hla lar ber tih hial ngam 'Despacito' chu Favorite Song category-ah chawpchhuah a ni bawk.