Lersia Play-ah Dengi I Love You a 'hit'
Film dah thar turte chu...
Mizo Movie Streaming Platform hmasa ber Lersia Play-ah 'Dengi I Love You' kha a fuh a, leitu pawh an tam tawh hle. Film dah thar tur a awm nualtih Lersia Play app siamtu lam chuan Vanglaini palai an hrilh a, Mizo film tuipui tan chuan bengchhitna tur chi tak a ni ngei ang.
Mipuiin Mizo film an hlût
Lersia Play-ah hian tunah hian film eng emaw zat dah a ni tawh a, application an tlangzarh ruala an dah nghal 'Bangla No.9' kha mipuiin an hlût hle tih Lersia Play app buatsaihtute chuan an sawi a, "Mizo Movie Industry atana bung thar pawimawh tak kan kaipui niin kan inhria," tiin an sawi hial.
Tunhnai khan Zote Entertainment leh H. Lalsangzela te buatsaih 'Duhaisam' leh Conflate Video Production leh B. Lalbiakvela te buatsaih 'Dengi I Love You'-te chu dah thar lehin, heng film-te pawh hian hlût a hlawh hle.
'Dengi I Love You' a fuh
'Dengi I Love You' phei chuan hlût a hlawh lehzual a, Lersia Play-a dah aṭanga kar khat chhunga entu tam ber ni nghalin, nimin thleng khan mi 23,000 vel laiin he film hi an lei tawh! Bawmrang TV kaltlangin eng emaw zatin an lei tawh bawk a, streaming platform kaltlanga Mizo film en hlawh ber a nih hial a rinawm.
Mi 23,000-in an lei aṭang hian eng emaw zat chuan chhungkuain an en a rinawm a, chubakah ṭhiante 'share' emaw an awm nual bawk ang tih a rinawm a, chumi avang chuan he film hi entu an tam ang tih a chiang.
Film dah thar turte chu
Film dah tur pakhat chu Leitlang Pictures movie siam hmasak ber 'House No 109' kha a ni. He film hmuhnawm zia leh en tlakzia chu a en tawhte chu a hrechiangtu an ni a, la en lo tan chuan Lersia Play-ah pawisa tlemte chawiin a en theih thuai dawn.
He film bakah hial film tawi 'Ka Chawl ta' tih te, 'Mission' te bakah 'Ṭhian Lungdum' tihte chu he application kaltlang hian sum tlemte chawiin a en theih thuai dawn bawk.
Tunah hian Leitlang Pictures lam chuan 'Dial 112' tih film an buaipui mek a, October thla tawp lamah chuan he film pawh hi apps lamah hian dah hman an tum a ni.
Lersia Play
Lailen Consulting Pvt. Ltd. leh C. Lalhmangaiha, Leitlang Pictures-te buatsaih Mizo Movie Streaming Platform-ah hian film hrang hrang (film tawi leh series huamin) 20 chuanga a awm tawh a, tunah hian Google Play lamah chuan mi singnga chuangin an download tawh.
"Mi tam takin streaming platform dang, khawvel huapa lar tak tak Netflix, Amazon Prime, etc. te nen a movie en man chungchangahte min khaikhin ṭhin a, amah-erawhchu, he Platform a content awmte hi Mizo population tlemte en theih tura siam a nih avangin movie man chungchang te, a en theih hun chungchangahte pawh hunbi neia en theih a siam hi a ngai a ni," tiin app buatsaihtu lam chuan an sawi a, Mizo mipuite'n an hlût avangin lawmthu an sawi bawk.